Ինձ վրա հարձակված ՀՅԴ 2 անձանց նկատմամբ քրեական հետապնդումը չի ավարտվել․ ՀԱԿ ակտիվիստ

«Իրականում ինձ վրա հարձակված և ծեծի ենթարկած մարդկանց նկատմամբ քրեական հետապնդումը չի դադարեցվել։ Ինչ վերաբերում է 2 տասնյակ մարդկանց, որոնց նկատմամբ քրեական հետապնդումն ավարտվել է, ապա նրանք մտել են Քննչական կոմիտե ու հաղորդում տվել, որ քաղաքական ակցիայի շրջանակում իրենք են ինձ ծեծել, բայց իրականում նրանք կապ չունեն ինձ ծեծելու հետ։ Բնականաբար իրենց դեմ հանցակազմ չկա»,- այս մասին ԼՈՒՐԵՐ․com-ի հետ զրույցում ասաց ՀԱԿ ակտիվիստ Վարդան Հարությունյանը՝ անդրադառնալով երեկ տարածված տեղեկություններին, թե ՀՀ քննչական կոմիտեն օրերս որոշում է կայացրել քրեական հետապնդում չիրականացնել նրան ծեծելու պատասխանատվությունը ստանձնած շուրջ 2 տասնյակ ՀՅԴ–ականների նկատմամբ՝ հանցակազմի բացակայության հիմքով։

Նրա խոսքով՝ իրեն հարձակման ենթարկելու գործով նախաքննությունն ավարտվել է, գործն ուղարկվել է դատախազություն և շուտով կմտնի դատարան։ Ակտիվիստի կարծիքով՝ իր նկատմամբ կատարվածը քաղաքական պատվեր է եղել, իսկ իր վրա հարձակված մարդկանց նկատմամբ հետապնդումը չի դադարել․ «Ինձ վրա հարձակվածները ՀՅԴ 2 անդամներ են, որոնց հետ գործի շրջանակում ես առերեսվել եմ»,- նշեց նա։ 

Ակտիվիստը նշեց նաև, որ 2 տասնյակ մարդիկ ակցիայի շրջանակներում Գեղամ Մանուկյանի հորդորով են գնացել ոստիկանություն, հանձնվել և հայտնել, թե իբր իրենք են ծեծել իրեն․ «Գեղամ Մանուկյանն, ով հրապարակային հայտարարել էր, որ ինքն է ինձ ծեծել, և գնում է ոստիկանություն ներկայանա, ինքը ոչ ոստիկանություն է մտել, ոչ էլ հայտարարություն տվել»,- ասաց նա։ 

Նշենք, որ հունիսի 3–ին ՀԱԿ ակտիվիստ Վարդան Հարությունյանը դիմել էր իրավապահներին` հայտնելով, որ աշխատավայրի մոտ իրեն ծեծի են ենթարկել, իսկ դրանից մի քանի օր առաջ էլ անհայտ անձինք իրենց շենքի բակում ձեռքերով հարվածներ են հասցրել իր դեմքին և գլխին՝ պատճառելով վնասվածք: Ակտիվիստն իրեն բռնության ենթարկելու համար մեղադրում է դաշնակցականներին։ Ակտիվիստին ծեծի ենթարկելու կասկածանքով ոստիկանները բերման էին ենթարկել ՀՅԴ–ական Յուրա Հովհաննիսյանին։ Դրանից հետո «Երկիր մեդիա» հեռուստաընկերության լրատվական և հասարակական-քաղաքական հաղորդումների տնօրեն, ՀՅԴ–ական Գեղամ Մանուկյանը և շուրջ 2 տասնյակ դաշնակցականներ ինքնակամ ներկայացել էին ոստիկանություն և հայտնել, որ իրենց վրա են վերցնում ՀԱԿ ակտիվիստին ծեծելու պատասխանատվությունը։

Վարդան Հարությունյանի հետ կապված միջադեպի փաստի կապակցությամբ հարուցվել է քրեական գործ՝ ՀՀ քրեական օրենսգրքի 118 հոդվածի հատկանիշներով:

Սոնա Հարությունյան