Ավետ Բարսեղյան. «Նազենիի, Սոֆիի, Արսենի, Ռազմիկի խաղը շատ տպավորիչ էր»

Հանրային հեռուստաընկերության նոր եթերաշրջանում հեռուստադիտողները կտեսնեն նոր՝ «Գուշակիր մեղեդին» հաղորդումը, որը կստուգի հայ հայտնիների լսողությունը։ Նախագիծը վարում է Ավետ Բարսեղյանը։ BlogNews.am-ի հետ զրույցում Ավետը մանրամասներ է պատմել հաղորդման և գործունեության այս փուլի մասին։

Ավետին երբեմն բնորոշում են որպես «թափառական հաղորդավար», քանի որ նա պարբերաբար փոխում է իր հեռուսաընկերությունը, հաղորդումները։ Նա նշեց, որ դա և՛ իր ընտրությունն է, և՛ հանգամանքների բերումով է այդպես ստացում։ «Կարծում եմ՝ եթե փոփոխություն չլինի, մարտահրավեր և աճ էլ չի լինի։ Ինձ համար նոր մարտահրավեր է «Գուշակիր մեղեդին», որը միջազգային հայտնի ձևաչափ է։ Թյուր կարծիք կա, թե նախագիծը ռուսական է, իրականում այդպես չէ։ Ես բավականին շատ եմ վարել միջազգային նախագծեր, ինձ համար սա ևս մեկ փորձություն էր»,- ասաց հաղորդավարը։

Միջազգային նախագծերի դեպքում, երբ հեռուստադիտողներն արդեն տեսել են մեկ այլ մատուցում, խնդիրը մի փոքր բարդանում է. «Բնականաբար դժվար է, երբ արդեն կա կարծրատիպ, պետք է ամեն ինչ անես, որպեսզի այդ ամենը քո ձեռագրով էլ հետաքրքիր լինի։ Հանրային հեռուստաընկերությունը շատ պրոֆեսիոնալ է մոտենում հարցին։ Մենք պահպանել ենք ձևաչափը, քանի որ գոյություն ունի կանոնակարգ, սակայն մեր դեպքում ավելացել են նաև հայկական երգեր»։

Ըստ Ավետի՝ հայ հայտնիների մասնակցությունը նախագծին շատ գունավոր է ստացվել: «Յուրաքանչյուրն իր էմոցիան է տալիս այս ամենին, ու շատ հետաքրքիր է ստացվում։ Ինձ համար շատ տպավորիչ էր Ռազմիկ Ամյանի, Նազենի Հովհաննիսյանի, Սոֆի Մխեյանի, Արսեն Գրիգորյանի խաղը, և ամենևին կապ չունի՝ ով քանի մեղեդի է ճիշտ գուշակել, էստեղ կարևորն էներգետիկան է»,- նշեց նա։

Նյութը՝ Ամալյա Հովհաննիսյանի

Աղբյուրը՝ BlogNews.am