Բա Կարեն Կարապետյանին չլսե՞նք. Անդրանիկ Քոչարյանը՝ ապրիլյան պատերազմի հարցով ուսումնասիրության մասին

Ապրիլյան պատերազմի հարցով քննիչ հանձնաժողովի հաջորդ նիստը չի ուշանա։ Այս մասին այսօր՝ հունիսի 4-ին, լրագրողների հետ զրույցում ասաց Ապրիլյան պատերազմի հարցով քննիչ հանձնաժողովի նախագահ Անդրանիկ Քոչարյանը՝ հանձնաժողովի առաջին նիստից հետո։

Նա հավելեց, որ բոլոր նիստներն էլ  փակ են լինելու։

Հարցին՝ հանձնաժողովը 6 ամսում կամփոփի՞ աշխատանքները, թե՞ դիմելու են երկարաձգելու, հանձնաժողովի նախագահը պատասխանեց.  «Ես կարծում եմ, որ մենք պետք է այնպես աշխատենք, որ հաջորդ 6 ամիսը այլ խնդիրներով զբաղված լինենք, սակայն եթե անհրաժեշտ համարենք, կդիմենք, որ եւս 6 ամսով երկարացնենք»։

Լրագրողները հետաքրքրվեցին՝ հանձնաժողովը կկարողանա՞ բացահայտել Զինված ուժերում առկա թերությունները ապրիլյան պատերազմի օրերին, նա նշեց. «Ով փնտրում է, նա գտնում է, վերջիվերջո, Կարեն Կարապետյանն է հայտարարել, որ համապատասխան որակի բենզին չի եղել, բա Կարեն Կարապետյանին չլսե՞նք, պետք է լսենք, չէ՞։ Մենք գիտենք՝ Զինված ուժերին վառելիքի մատակարարը հայտնի «Ֆլեշ» ընկերությունն է. եւ գիտենք բոլոր մանր ընկերություններին, կտեսնենք՝ նրանք իրենց պարտավորություններն արդյոք բարեխիղճ կատարո՞ւմ են»։

Դիտարկմանը, թե կա վարկած, որ դավադրություն է եղել ապրիլյան պատերազմը, Անդրանիկ Քոչարյանը նկատեց. «Ես չեմ բացառում, որ լինեն դավադրություններ, բայց այդ ճանապարհը մերը չէ, մենք կգնանք փաստերի հավաքագրման եւ գնահատման ճանապարհով, եթե պարզվեց, որ դավադրություն կա, դավադիրները կհայտնաբերվեն»։

Նա հույս հայտնեց, որ ապրիլյան պատերազմի հանգամանքների ուսումնասիրման հարցում լավ հիմք կստեղծեն. «Եթե մեզ շատ առաջ չհաջողվի գնալ, կստեղծենք հիմք, որ հաջորդները վերցնեն մեր եզրակացությունը եւ գնան առաջ, բայց մենք կփորձենք հաջորդների վրա շատ բան չթողնել կամ ընդհանրապես չթողնել»։