Պատուհանին էր մոտեցել, որ ստուգի`արդյոք դեզը վառվում է. պատմում է Կոթիի վիրավորված բնակչուհին

NEWS.am-ը գրում է.

Հակառակորդի գնդակից ոտքի շրջանում հրազենային վնասվածք ստացած Տավուշի մարզի Կոթի համայնքի 22-ամյա բնակիչ Ռազմիկ Թումանյանն արդեն մեկ օր է` դուրս է գրվել «Մուրացան» հոսպիտալից: Այս մասին NEWS.am-ի հետ զրույցում ասաց նրա մայրը՝ 42-ամյա Նազիկ Թումանյանը, որը նույնպես նույն օրը բեկորային վնասվածքներ էր ստացել և տեղափոխվել հոսպիտալ:

«Առավոտյան 9:00-ի կամ 10:00-ի կողմերն էր,  մեր տան մեջ՝ սենյակում, հակառակորդի կրակոցից տղաս ոտքի շրջանում վիրավորվեց, հոպիտալում վիրահատեցին, հիմա հորեղբոր տուն է տեղափոխվել, դեռ չի կարողանում ոտքը գետնին դնել»,-պատմեց Նազիկ Թումանյանը:

 Սեպտեմբերի 2-ի առավոտյան տիկին Նազիկի ամուսինը՝ Հայկ Թումանյանը, անասուններին դաշտ էր տարել, առավոտյան 6:00-ի մոտ հակառակորդը սկսել է կրակել, ամուսինը մի կերպ հասցրել է անասուններին տուն բերել: Հակառակորդի կրակոցներից վառվել է Թումանյանների հարևանի խոտի դեզը, տիկին Նազիկը մոտեցել է պատուհանին, որ ստուգի՝ իրենց խոտի դեզն էլ է վառվում, թե ոչ: Մի սենյակից մյուս սենյակ անցնելիս էլ ստացել է բեկորային վնասվածքներ. «Ինձ ու տղայիս միանգամից տեղափոխեցին Նոյեմբերյանի հիվանդանոց, այնտեղից էլ այստեղ՝ հոսպիտալ»,- պատմեց Նազիկ Թումանյանը:

Տիկին Նազիկի խոսքով` Կոթիում բնակիչներն արդեն սովոր են հակառակորդի կրակոցներին. երբ կրակոցների ձայն են լսում, մտնում են իրենց նկուղները: Նազիկ Թումանյանն ու իր ընտանիքն էլ վերջին մի քանի օրերի մեծ մասը հիմնականում տան նկուղում են անցկացրել. միշտ  զգուշանում են բակում, կամ դաշտում գործ անելիս: Նազիկ Թումանյանի ընտանիքը, չնայած բազմաթիվ դժվարություններին, շարունակում է մնալ հայրենի գյուղում։ Նա  սիրում է Կոթին և հավատում, որ կգա մի առավոտ, երբ ինքն ու համագյուղացիները առանց զգուշանալու դուրս կգան դաշտ  աշխատելու, իսկ տան նկուղները կօգտագործեն միայն բերքը լցնելու համար։

Հիշեցնենք, որ սեպտեմբերի 2-ի երեկոյան լարված իրավիճակ է եղել Տավուշի մարզում։ Հակառակորդը կրակ էր բացել սահմանամերձ մոտ 20 գյուղերի ուղղությամբ: Հակառակորդի գնդակից վիրավորվել են Կոթիի երկու բնակիչներ, որոնք տեղափոխվել են Նոյեմբերյանի բժշկական կենտրոն, այնտեղից էլ` «Մուրացան» հոսպիտալ: