Արտակարգ դեպք Արմավիրում. 6–ամյա տղան խմել է խաղողի վազերի համար նախատեսված բուժանյութը

NEWS.am-ը գրում է.

Արմավիրի մարզում արտակարգ դեպք է տեղի ունեցել այսօր` սեպտեմբերի 5–ին։ 6-ամյա տղան պատահաբար խմել է խաղողի վազերի համար նախատեսված բուժանյութը։

«Առավոտյան թույնը վերցրել էի, որ տանեի, բաղը սրսկեի, ձեռքը գցեց, իմացավ, թե կոլա ա, խմեց: Տարանք Արմավիրի հիվանդանոց, այնտեղից էլ բերել ենք Երեւան»,- NEWS.am-ին ասաց երեխայի հայրը։

Երեխան այժմ գտնվում է «Մուրացան» համալսարանական հիվանդանոցում: Հիվանդանոցի գլխավոր բժիշկ Բագրատ Բավեյանը NEWS.am-ի հետ զրույցում ասաց, որ իրենք երեխային արդեն ներարկել են ֆոսֆորօրգանական միացության հակաթույնը, որը գտել են իրենց միջոցներով, քանի որ այդ հակաթույնը Հայաստան չի ներկրվում առողջապահության նախարարության պատվերով։

«Այդ դեղորայքը Հայաստանում ընդհանրապես չկա, գրանցված դեղորայք չի, դա մենք ձեռք էինք բերել մեր կապերի միջոցով»,– ասաց բժիշկը։

Երեխայի հայրը, որն ահազանգել էր NEWS.am-ի խմբագրություն,նշեց, որ հակաթույնի առաջին չափաբաժինը կբավականացնի մինչեւ վաղը կեսօր, իսկ հիվանդանոցում երկրորդը չկա։ Առողջապահության նախարարությունից մեզ տեղեկացրին, որ այդ հակաթույնը չկա նախարարության պատվերով գնվող դեղերի  ցանկում։

Մինչ նյութը պատրաստում էինք` փոքրիկ Գոռի հայրը զանգահարեց ու տեղեկացրեց, որ հակաթույնը ճարվել է։

Երեխայի վիճակն այժմ կայուն է։ Բայց դեղերի վերջնական ազդեցության մասին դեռ վաղ է խոսել։