Պետությունը ոչինչ չի անում Արցախը բանակցային գործընթաց վերադարձնելու համար. Գեւորգ Գորգիսյան
ՄիջազգայինՄենք հիմա ցանկանում ենք Արցախը վերադարձնենք բանակցությունների սեղանի շուրջ, եւ մեր պետական ապարատն իր ամբողջ կազմով, իր ամբողջ դիվանագիտությամբ այդ ուղղությամբ ոչինչ չի անում: Այդ մասին Արցախում ընթացող «Հայաստան-Արցախ ռազմավարական դաշինք» ֆորումում ասաց «Լուսավոր Հայաստան» խմբակցության քարտուղար Գեւորգ Գորգիսյանը:
Գորգիսյանն իր ելույթում, մասնավորապես նշեց.
«Այսօր ուզում ենք ընդունել հերթական հռչակագիրը, որը վերացական մտքի շարադրանք է: Մենք հստակ չենք ձեւակերպել այն նպատակը, ինչին պետք է ծառայի Հայաստան- Արցախ ռազմավարական դաշինքը: Հստակ չկա այն գործիքակազմը, որով մենք պետք է աշխարհին ցույց տանք, որ դա անհրաժեշտ է եւ պետք: Մեր պետությունները արդոք պատրստ են այդ բեռը կրելուն: Մենք հիմա ցանկանում ենք Արցախը վերադարձնենք բանակցությունների սեղանի շուրջ, եւ մեր պետական ապարատն իր ամբողջ կազմով, իր ամբողջ դիվանագիտությամբ այդ ուղղությամբ ոչինչ չի անում: Կան հռչակագրային դրույթներ, բայց այդ ուղղությամբ շատ քիչ քայլեր են արված: Ես վստահ չեմ այս փուլում ճիշտ է դաշինքը, թե՝ ոչ: Բայց քննարկումը շատ լավն է եւ դրական, քանի որ խոսելով խնդիրների մասին, մենք հասկանում ենք՝ որքանով է այս գործիքը ճիշտ այդ խնդիրները լուծելու համար:
Այո, խնդիրները կան, առկա է ինտեգրման խնդիր, կա ճանաչողության խնդիր, կա հստակ նպատակների ձեւակերպման խնդիր, եւ այդ ամենը պետք է լուծումներ ստանա, բայց ոչ հռչակագրային: Կոչ եմ անում բոլորիս սկսել ռեալ աշխատանք այդ ուղղությամբ: Առանց Արցախ չի կարող լինել Հայաստան, եւ այդ կարեւոր խնդրին պետք է ծառայենք բոլորս: Բայց այդ գիտակցումը սկզբից պետք է լինի ողջ քաղաքական էլիտայի մոտ, հետո յուրաքանչյուր քաղաքացու մոտ: Քաղաքացիներն ամբողջությամբ չեն հասկանում ՝ ինչ է Արցախը, եւ ինչ է արցախյան խնդիրը: Եւ այդ ուղղությամբ պետք է բոլորս ամեն օր համատեղ աշխատենք: Եւ միայն սրանից հետո կարող ենք մտածել ուժեղացնելու գործիքակազմը, որովհետեւ վստահ չեմ, որ եղածն ամբողջությամբ ենք օգտագործում»:
1
2
3
4
5
1
2
3
4
5
3
4
5
