Արցախը լավագույնս հանձնել է քննությունը, բայց Հայաստանը այդ քննությունը դեռ չի հանձնել. Փոստանջյան
Ուշադրության կենտրոնումԵթե մենք երկու պետություններ ենք, ապա այդ փաստաթուղթը վաղուց պետք է ունենայինք: Հիմա մեզնից որն է ավելի թերի պետություն. Արցախը, որը ճանաչված չէ, թե Հայաստանի Հանրապետությունը, որը ճանաչված է, բայց չի ճանաչել Արցախ նահանգը՝ որպես հայկական պետություն, և նրա հետ չունի համապատասխան փաստաթուղթ: Այս մասին այսօր՝ մայիսի 7-ին Ստեփանակերտում ընթացող «Հայաստան-Արցախ ռազմավարական դաշինք» համաժողովում հայտարարեց «Երկիր ծիրանի» կուսակցության նախագահ, իրավաբան Զարուհի Փոստանջյանը: Նրա խոսքով՝ «Հայաստան-Արցախ ռազմավարական դաշինքի» կնքելու փաստաթղթին պետք է Հայաստանի և Արցախի Ազգային Ժողովները կողմ լինեն.
«Եթե ուզում ենք՝ մեզ հետ հաշվի նստեն, ապա մեր ռազմավարությունն ու անվտանգությունը չպետք է ուղղված լինի միայն պաշտպանությանը, վստահ եմ, որ ժամանակի ընթացքում Վանն էլ կճանաչվի որպես հայկական մայրաքաղաք: Ինչպես է Միացյալ նահանգները ճանաչում Գոլանի բարձունքները, որպես Իսրայելի տարածք, և ինչպես է Երուսաղեմը ճանաչում որպես Իսրայելի մայրաքաղաք: Մենք էլ կարող ենք, եթե մենք ճանաչում ենք մեր իրավունքները մեր պետության և նահանգի նկատմամբ, ուրեմն մեզ հետ էլ հաշվի կնստեն»,- ասաց Փոստանջյանը:
Նա անդրադարձավ նաև Հայաստան և Ադրբեջանի միջև բանակցություններին, նշեց, որ առայժմ գործում է «մադրիդյան սկզբունքներ» փաստաթուղթը. «Այսօր համաշխարհային իրադարձությունների ներքո, մեր հայկական կողմը բանակցում է, թեպետ ասվում է՝ բանակցություններ չենք իրականցնում, բայց սեղանի շուրջ դրված էր «մադրիդյան սկզբունքներ» փաստաթուղթը, որը ենթադրում է մեր Արցախ նահանգի տարածքների հանձնում: Ու կարևոր պայմանը, որ այդ տարածքները պետք է հանձնվի՝ առաջին հերթին մեր հայկական զինված ուժերի դուրս բերմամբ»,- ասաց նա, և ավելացրեց, որ առնվազն երկու կողմից լինելու է հարձակում. «Մեր այսօրվա զինված ուժերը պետք է արևելյան սահմանը պահպանեն, և այնտեղ գտնվեն օրինական կարգով: Պետք է ունենանք ազգային անվտանգության ռազմավարություն, քանի որ ունենք մի փաստաթուղթ, որը ընդունել ենք 2007 թվականին դա վաղուց հնացած փաստաթուղթ է: Մենք երկու կողմից ունենալու ենք հարձակում՝ մեկը նախիջևանյան հատվածն է, մյուսը այստեղի՝ մեր հատվածը: Եվ պետք է ունենանք մեր քայլերը անմիջապես հարձակումից հետո՝ որոնք են լինելու մեր քայլերը, թե՛ Նախիջևանի մասով, թե՛ մնացած դաշտային Արցախի մասով: Պետք է ունենանք պատրաստի մեր հայեցակարգերն ու գործողությունները»,- ասաց Փոստանջյանը, և վերհիշեց ապրիլյան պատերազմը, թե որքան կորուստներ ունեցան Արցախն ու Հայաստանը.
«25 տարիների ընթացքում Արցախը լավագույնս հանձնել է քննությունը, բայց Հայաստանի Հանրապետությունը՝ Արարատյան մեր նահանգը այդ քննությունը դեռ չի հանձնել: Բոլորս պետք է այնպես անենք, որպեսզի այդ քննությունը կարողանանք հանձնել, և երբ քննություն հանձնեցիք 2016 թվականն ապացուցեց, որ պահեցիք սահմանը, բայց մեր երիտասարդների անգին կյանքերի գնով»,- հայտարարեց նա, և հույս հայտնեց, հայտնեց որ երկու կողմերի միջև ռազմավարական դաշինքին կաջակցի նաև ինքը՝ Զարուհի Փոստանջյանը:
1
2
3
4
5
1
2
3
4
5
2
