Մեր երկիրը կանացի խնամքի կարիք ունի. Փաշինյանը՝ Կանանց ձեռներեցության միջազգային համաժողովում

Դժվար թե Հայաստանում տնտեսական հեղափոխությունը հաջողության հասնի, եթե մենք չխթանենք կանանց ձեռներեցությունը: Այս մասին, այսօր՝ ապրիլի 26-ին, Կանանց ձեռներեցության միջազգային համաժողովում իր ելույթում նշեց ՀՀ վարչպետ Նիկոլ Փաշինյանը:

«Վերջին մեկ տարվա ընթացքում կանանց դերը եւ ակտիվության մակարդակը նկատելիորեն բարձրացել է եւ թույլ տվեք ասել, որ թավշյա հեղափոխությունն իրականություն չէր դառնա, առանց կանանց այդպիսի լայնամասշտաբ մասնակցության: Սա առաջին նշանն էր ինձ համար, որ Հայաստանում սկսվել է հեղափոխություն: Կանանց դերը հեղափոխության մեջ շրջադարձային էր: Համոզված եմ, որ տնտեսական հեղափոխության մեջ եւս կանանց դերը լինելու է նույնքան կարեւոր եւ վճռորոշ»,-ասաց նա:

Փաշինյանը նկատեց, որ Հայաստանում բազմաթիվ ոլորտներ՝ սկսած կառավարման ոլորտից, սպասարկման մակարդակի բարձացումից, ավարտած բիզնեսի կազմակերպմամբ, կանացի խնամքի անհրաժեշտություն ունի. «Մեր երկիրն, ընդհանրապես կանացի խնամքի կարիք ունի: Երբ մենք մեր երկրի տարբեր անկյուններում տեսնում ենք չկազմակերպվածության, թափթփվածության, երբեմն փնթիության ընդլայնված երեւույթներ, սա եւս ակնհայտ է դարձնում այդ կարիքը: Սա նշանակում է, որ մենք բոլոր ոլորտներում խթանենք կանանց ակտիվությունը, ներգրավվածությունը: Սա մեր կառավարության համար առաջնահերթություն է»,-ընդգծեց Փաշինյանը:

Նշենք, որ Կանանց ձեռներեցության միջազգային համաժողովը Հայաստանում անցկացվում է առաջին անգամ: Համաժողովին մասնակցում են եւ ելույթներով հանդես եկան Տնտեսական զարգացման եւ ներդրումների նախարար Տիգրան Խաչատրյանը, ՀՀ -ում ԱՄՆ արտակարգ եւ լիազոր դեսպան Լին Թրեյսին, ՀՀ-ում Մեծ Բրիտանիայի  արտակարգ եւ լիազոր դեսպան Ջուդիթ Մարգրետ Ֆարնուորթը, ՀՀ-ում Ֆրանսիայի արտակարգ եւ լիազոր դեսպան Ժոնաթան Լաքոտը, Կին ձեռներեցների համաշխարհային ասոցիացիայի FCEM-հայաստանյան նախագահ,  Հայաստանի երիտասարդ կանանց ասոցիացիայի եւ ՀՀ Կին ձեռներեցների ցանցի նախագահ Լիլիթ Ասատրյան, Կին ձեռներեցների համաշխարհային ասոցիացիայի (FCEM) նախագահ Մարի Քրիստին Օղլին: