Խաղամոլ թոռը նախ գողացել է տատի ոսկեղենը, ապա սպանել նրան. նախաքննությունն ավարտվել է

ՀՀ քննչական կոմիտեի Կենտրոն եւ Նորք-Մարաշ վարչական շրջանների քննչական բաժնում ավարտվել է  Երեւանի բնակիչ Սիլվա Գալստյանի  սպանության դեպքի առթիվ հարուցված քրեական գործի նախաքննությունը, որի շրջանակներում  ձեռնարկված քննչական գործողությունների արդյունքում պարզվել է սպանության շարժառիթը, բավարար ապացույցներ ձեռք բերվել՝ այն թոռան կողմից կատարված լինելու վերաբերյալ։

Քննությամբ մասնավորապես պարզվել է, որ 24-ամյա երիտասարդը՝ Ա. Մոմջյանը, ժամանակավորապես բնակվել է իր տատիկին՝ Սիլվա Գալստյանին պատկանող բնակարանում, որեւէ տեղ չի աշխատել:

 Նախնական քննության տվյալներով՝ նա ունեցել է խաղամոլի հակումներ, տարբեր բուքմեյքերական գրասենյակներում կատարել խաղադրույքներ, մեծ գումարներ տանուլ տվել, պարտքեր կուտակել: Նշված պարտքերի մեծ մասը մարել է հայրը:

Վերջինիս պահանջով որդին 2014թ. մարտ ամսից տեղափոխվել է բնակվելու Սիլվա Գալստյանի` Կոտայքի մարզում գտնվող ամառանոցում: Երիտասարդը շարունակել է խաղամոլությամբ զբաղվել, ինչը չի վրիպել Ս. Գալստյանի աչքից: Այդ կապակցությամբ վերջինս հաճախակի դիտողություններ է արել նրան, որի կապակցությամբ էլ նրանց փոխհարաբերությունները լարված բնույթ են կրել:

Նախաքննությամբ բավարար ապացույցներ են ձեռք բերվել, որ 2014թ. սեպտեմբերի 1-ից մինչեւ սեպտեմբերի 15-ն ընկած ժամանակահատվածում երիտասարդը  գաղտնի հափշտակել է  իր տատիկին պատկանող ոսկյա զարդերը՝ շուրջ 2.963 մլն դրամ արժողության:

Կատարած հափշտակությունը տատից  թաքցնելու նպատակով 2014թ. սեպտեմբերի 15-ին՝ ժամը 19:00-ի սահմաններում, Երեւանում գտնվող  բնակարանում կյանքի համար վտանգավոր բռնություն է գործադրել նրա նկատմամբ՝ սեղմել պարանոցի օրգանները եւ սպանել։ Ապա՝  2014թ. սեպտեմբերի լույս 16-ի գիշերը՝ ժամը 03:00-ի սահմաններում, Ս.Գալստյանի դին՝ վերջինիս պատկանող «Տոյոտա պրադո» մակնիշի  ավտոմեքենայով տեղափոխել է Կոտայքի մարզի Գառնի գյուղից դեպի Արտաշատի տարածաշրջան տանող ավտոճանապարհի հարակից տարածք եւ այրել:

Մինչդատական վարույթում ձեռք բերված ապացույցների հիման վրա՝ Ա.Մոմջյանին  մեղադրանք է առաջադրվել ՀՀ քրեական օրենսգրքի 104-րդ հոդվածի 2-րդ մասի 11-րդ կետով եւ 177-րդ հոդվածի 2-րդ մասի 2-րդ կետով նախատեսված հանցավոր արարքներ կատարելու համար:

Քրեական գործը՝ մեղադրական եզրակացությամբ, ուղարկվել է նախաքննության օրինականության նկատմամբ հսկողություն իրականացնող դատախազին: