Գործող ընտրատեղամասերի մոտ 48 տոկոսը հարմարեցված չէ տեղաշարժման սահմանափակում ունեցող անձանց համար. «Ականատես» դիտորդական առաքելություն

ՀՀ-ում արտահերթ խորհրդարանական ընտրություններին գործող ընտրատեղամասերի մոտ 48 տոկոսը չի համապատասխանում տեղաշարժման սահմանափակում ունեցող անձանց համար պահանջվող հասանելիության նորմերին, այս մասին հայտնում է «Ականատես» դիտորդական առաքելությունը, որը դիտարկում է 300 ընտրատեղամաս ՀՀ ողջ տարածքում: 

Դիտորդական առաքելության ֆեյսբուքյան պաշտոնական էջից տեղեկանում ենք, որ դիտարկված ընտրատեղամասերի միայն 52 տոկոսն է հարմարեցված տեղաշարժման սահմանափակում ունեցող անձանց համար:

«Ականատես» -ը նկատում է, որ այս համակարգային խնդիրը շարունակում է չլուծված մնալ:

Հայտնի է նաև, որ քվեարկության սենյակի համապատասխան կահավորումը, որը ապահովում է քվեարկության գաղտնիությունը, առկա է դիտարկված ընտրատեղամասերից 96 տոկոսի դեպքում:

Ինչպես ավելի վաղ հայտնել է Tert.am-ը, ԱԺ արտահերթ ընտրություններին մասնակցում է թվով 11 քաղաքական ուժ` 9-ը կուսակցություն և 2 դաշինք: Նշենք, որ ՀՀ-ում իշխանափոխությունից հետո իշխանությունը պահանջում էր ԱԺ արտահերթ ընտրություններ: Վարչապետ Փաշինյանը հրաժարական տվեց, Ազգային ժողովը երկու անգամ չընտրեց վարչապետ, ինչից հետո ԱԺ-ն իրավունքի ուժով արձակվեց:

Կուսակցությունների համար անցողիկ շեմ է համարվում 5 տոկոսը, դաշինքների համար` 7-ը:

2018-ի խորհրդարանական ընտրությունների վերաբերյալ ոստիկանության կողմից վարվող ռեգիստրի վերջնական ցուցակներում ընտրողների թիվը կազմում է 2,573,779-ը: ՀՀ-ում կա 13 ընտրատարածք, որից 4-ը Երևանում:

11 քաղաքական ուժերը ներկայացրել են 1471 պատգամավորի թեկնածու: