Նոր Սահմանադրության նախագիծը համապատասխանում է եվրոպական չափանիշներին. Վենետիկի հանձնաժողով
Քաղաքականություն
Դուք եք ձեր երկրի եւ ձեր Սահմանադրության տերը: Այդ մասին Երեւանում, օգոստոսի 25-ին Հայաստանի քաղաքական կուսակցությունների եւ հասարակական կազմակերպությունների հետ հանդիպման ժամանակ հայտարարել է Վենետիկի հանձնաժողովի անդամ Քրիստոֆ Գրաբենվարտերը (Ավստրիա):
Անդրադառնալով «Ժառանգություն» կուսակցության խորհրդարանական խմբակցության անդամ Ռուբեն Հակոբյանի այն դիտարկմանը, թե ամենամտահոգիչը կայուն մեծամասնության ձեւավորման հարցն է և այն, թե որ երկրներում է կայուն մեծամասնություն ձեւավորվում նման` մեզ համար անընդունելի եղանակով (89-րդ հոդված – խմբ), Քրիստոֆ Գրաբենվարտերը նշել է. «Սկզբնական կարծիքն իրականում ելնում է այն իրավիճակից, որը ձեւավորվել է Սան Մարինոյում: Հունաստանում եւս նմանատիպ լուծումներ են տրվել: Մեր խնդիրն է` ուսումնասիրել մնացած բոլոր համակարգերը: Մենք ապահովում ենք խաղի կանոններին համապատասխանություն, իսկ Սահմանադրությունը խաղի կանոնների ժողովածու է»:
Վենետիկի հանձնաժողովի ներկայացուցիչը նշեց, որ ընդհանուր առմամբ, նախագիծը համապատասխանում է եվրոպական ստանդարտներին:
«Այն, որևէ կերպ չի հակասում եվրոպական ստանդարտներին, մենք թեև քննադատել էինք, որ կան ավելի լավ փորձեր, բայց նշել ենք, որ, մասնավորապես, մարդու իրավունքների ոլորտին առնչվող հոդվածները ամբողջությամբ համապատասխանում են եվրոպական ստանդարտներին»,– ասել է նա։
Հիշեցնենք, որ Հայաստանի սահմանադրական բարեփոխումների նախագծի ամբողջական տեքստն ուղարկվել է Ազգային Ժողով: Ակնկալվում է, որ Սահմանադրության փոփոխությունները կքննարկվեն երկրի խորհրդարանի աշնանային առաջին նստաշրջանի ընթացքում:
1
2
3
4
5
1
2
3
4
5
3
4
5
