Վրաերթից մահացած 8 ամսական երկվորյակների գործով լարված դատավարություն է սպասվում

NEWS.am-ը գրում է.

Երեւանում վրաերթի հետևանքով այս տարվա սկզբին մահացած 8 ամսական երկվորյակ եղբայրների գործով լարված դատավարություն է սպասվում։ Զավակներին կորցրած Աննա Հարությունյանն առողջական խնդիրներ ունենալու հիմնավորմամբ չի ներկայացել առաջին նիստին, ինչը պաշտպանական կողմին հիմք է տվել ենթադրելու, որ տուժող կողմը միտումնավոր է ձգձում դատավարությունը։

Առաջին` հետաձգված նիստից հետո, NEWS.am-ի հետ զրույցում Աննա Հարությունյանի հայրը`Միքայել Հարությունյանը ասաց, որ  իր դուստրը դեռ չի կարողանում դուրս գալ շոկային վիճակից եւ առողջական խնդիրներ ունի։

«Շոկային վիճակի մեջ է. 30 տարեկանում 2 երեխա է կորցրել, չի կարողանում մոռանալ: Ես պահանջում եմ, որպեսզի Ռազմիկ Ավետիսյանին պատժեն օրենքի ամբողջ խստությամբ, նաև պահանջում եմ նյութական և բարոյական փոխհատուցում: Նա պետական մարմնում էր աշխատում ու թաքցնում էր իր հիվանդությունը, այս դեպքից հետո հիվանդությունը հանեց ջրի երես պատժից խուսափելու համար»,-ասաց նա:

Պաշտպանական կողմը բավական ագրեսիվ է տրամադրված, նրանք պնդում են, որ տուժող կողմի բոլոր գործողություններն ուղղված են իրենցից նյութական փոխհատուցում ստանալուն, իսկ երկվորյակների մայրը հիվանդ է ձեւանում, որպեսզի դատական նիստերը հետաձգվեն։

 «Նրան փողոցում տեսնողներ են եղել, հեչ էլ հիվանդ չէ: Եղբայրս է հիվանդ, որին  խնամք է հարկավոր: Տուժող կողմն ամեն ինչ անում է, որ 3-րդ զոհն էլ ավելանա այս գործում: Մենք նրանց դրամական փոխհատուցում էլ ենք տվել, հոգացել ենք բուժման բոլոր ծախսերը։ Դժբախտ պատահար է տեղի է ունեցել, իրենցից ավելի շատ ենք ցավում այդ երեխաների մահվան համար, բայց ի՞նչ կարող ենք անել»,-ասաց նա:

Ամբաստանյալի քրոջ խոսքով` եղբայրը ոչինչ չի հիշում դեպքից, քանի որ եղել է անգիտակից վիճակում։

«Ռազմիկն ասում է` ես մեղավոր չեմ, ոչինչ չեմ հիշում, երբ ուշքի եմ եկել, արդեն եղել եմ քննչականում:  Ասում ա` ես գիտեի, թե մենակ մեքենաս է ջարդվել, հետո ասացին, որ երեխա էլ է մահացել, ես վատացա»,–նշեց Սոնա Դավթյանը։

Ավելի վաղ NEWS.am-ը հայտնել էր, որ փետրվարի 19-ին՝ ժամը 11:30-ի սահմանում, քաղաքացի Ռ.Ավետիսյանի վարած «Ֆոլքսվագեն» մակնիշի ավտոմեքենան ընթացել է Մարաշի Արմենակյան փողոցով Հերացու փողոցի ուղղությամբ, շուրջ 40կմ/ժ արագությամբ: Հասնելով Արմենակյան փողոցի թիվ 122 հասցեի դիմաց՝ վրաերթի է ենթարկել 82-ամյա Անահիտ Կարապետյանին, ապա դուրս եկել երթեւեկելու գոտուց եւ բարձրանալով մայթին վրաերթի ենթարկել 29-ամյա Աննա Հարությունյանին, նրա մանկահասակ երկվորյակ որդիներին, այնուհետեւ բախվել ցանկապատին: Երկվորյակները մահացել են, նրանց մայրն էլ վնասվածքներ ստացել։

Դեպքի առթիվ հարուցվել է քրեական գործ՝ ՀՀ քրեական օրենսգրքի 242-րդ հոդվածի 2-րդ մասով` ճանապարհային երթեւեկության կանոնները խախտելը, ինչն անզգուշությամբ առաջացրել է մարդու մահ: