Ախուրյանցիները դարձել են «Հետազոտվի՛ր, բուժվի՛ր, կանխարգելի՛ր» հանրային միջոցառման շահառու

Նոյեմբերի վերջին շաբաթը նշվում է Հետազոտության եվրոպական շաբաթը, որին միանալով՝ «Հայկական Կարիտաս»-ը, «ՄԻԱՎ/ՁԻԱՀ-ի կանխարգելումը հետխորհրդային երկրներում» ծրագրի շրջանակներում դեկտեմբերի 23-ին Ախուրյան համայնքում իրականացրեց «Հետազոտվի՛ր, բուժվի՛ր, կանխարգելի՛ր» խորագիրը կրող հանրային միջոցառում։ Դրա ընթացքում ՀՀ առողջապահության նախարարության ՁԻԱՀ-ի կանխարգելման հանրապետական կենտրոնի հետ համատեղ անցկացվեց ՄԻԱՎ-ի, հեպատիտ B-ի և հեպատիտ C-ի վերաբերյալ հետազոտություն։

Ինչպես «Արմենպրես»-ին տեղեկացրեց ծրագրի ղեկավար Գայանե Նորիկյանը, միջոցառման նպատակն էր Ախուրյան համայնքի բնակիչներին հնարավորություն ընձեռել անվճար և անանուն հետազոտվել ՄԻԱՎ-ի և հեպատիտ B-ի և C-ի վերաբերյալ արագ թեստավորման միջոցով: Հետազոտվողները ստացան նախաթեստային և հետթեստային անվճար խորհրդատվություն: Ներկայումս Հայաստանի Հանրապետությունում ՄԻԱՎ-ով ապրող մարդկանց հաշվարկային թիվը կազմում է 3 300, որոնցից միայն 60%-ը գիտի իր կարգավիճակի մասին: ՄԻԱՎ վարակի գրանցված դեպքերի հաշվարկը վկայում է այն մասին, որ ամենաբարձր ցուցանիշը Շիրակի մարզում է՝ 100,000 բնակչի հաշվով։ «ՄԻԱՎ/ՁԻԱՀ-ի կանխարգելում հետխորհրդային երկրներում» ծրագիրը, խիստ կարևորում է իրազեկման դերը հատկապես Շիրակի մարզի ազգաբնակչության շրջանում՝ ընդգրկելով նաև ավագ օղակում սովորող դպրոցահասակ աշակերտներին, ովքեր արդեն դպրոցական նստարանից կիմանան վտանգից զգուշանալու կանոնները և զերծ կմնան ՄԻԱՎ-ով վարակվելու ռիսկից։

«Այս ընթացքում այցելուները հետազոտվում են ոչ միայն ՄԻԱՎ-ի, այլ նաև հեպատիտ B-ի և հեպատիտ C-ի վերաբերյալ, որոնք նույնպես վարակիչ հիվանդություններ են, և վարակի ուղիները գրեթե նույնն են: Այցելուներն այս ընթացքում կտեղեկացնեն վաղ կլինիկական շրջանի, փոխանցման ուղիների, ռիսկային վարքագծի և ստուգման ժամկետների մասին: Ընդհանուր առմամբ, հիվանդների 70 տոկոսը միգրանտներն են՝ հատկապես վերարտադրողական տարիքի տղամարդիկ, իսկ եթե նրանք չեն հետազոտվում ու չեն իմանում դրա մասին, կարող են նաև Հայաստան վերադառնալով՝ վարակել իրենց կանանց, իսկ կրծքով կերակրող մայրը կարող է վարակել նաև երեխային: Շիրակի մարզը տոկոսային առումով Հայաստանում առաջատար է ՄԻԱՎ վարակով հիվանդացության աստիճանով. այստեղ ամենակարևոր դերը միգրացիոն գործոնն է»,- նշեց ՁԻԱՀ-ի կանխարգելման հանրապետական կենտրոնի բժիշկ Յուլիա Մանուկյանը: Ծրագիրը ֆինանսավորում է «Կարիտաս Ավստրիա»н (Ինսբրուկ) և Ավստրիայի զարգացման գործակալությունը։

Արմենուհի Մխոյան