Սպիտակ տունը բացատրել է՝ ինչու Թրամփը Ֆրանսիայում չի այցելել մոտ 2.000 ամերիկացի զինվորների շիրիմներին

Սպիտակ տունն արձագանքել է երեկ լրատվամիջոցների կողմից ամենաշատ քննարկված թեմաներից մեկին՝ անձրևի պատճառով ԱՄՆ նախագահ Դոնալդ Թրամփի` ամերիկյան զինվորական գերեզմանատուն չգնալուն՝ պարզաբանելով, որ նա պարզապես չէր ցանկանում կաթվածահար անել երթևեկությունը:

Ինչպես նշում է The Guardian-ը, նախապես ծրագրված էր, որ ԱՄՆ նախագահը պետք է ծաղկեպսակ դներ ու մեկ րոպե լռությամբ հարգեր Առաջին աշխարհամարտում ընկած մոտ 2.000 ամերիկացի զինվորների հիշատակը: Երեկ Սպիտակ տնից տեղեկացրել էին, որ Թրամփը «Բու Բելյո» զինվորական գերեզմանատուն այցը չեղարկել է ուժեղ անձրևի պատճառով, սակայն այսօր արդեն այլ բացատրություն է ներկայացրել:

Սպիտակ տան մամուլի խոսնակ Սառա Սանդերսը մանրամասնել է, որ նախագահական ավտոշարասյան տեղաշարժի պատճառով Փարիզի իշխանությունները ստիպված կլինեին փակել փողոցները, ինչն էլ անհարմարություն կպատճառեր բնակիչներին:

«Նախագահ Թրամփը չէր ցանկանում այդ աստիճան չնախատեսված անհանգստություն պատճառել քաղաքին ու դրա բնակիչներին»,- ասել է խոսնակը:

Հայտնի է, որ Թրամփի՝ գերեզմանատուն չայցելելու որոշումը կոշտ քննադատել էր Մեծ Բրիտանիայի նախկին վարչապետ Ուինսթոն Չերչիլի թոռը՝ Նիկոլաս Սոմսը, որն իր թվիթերյան էջում գրել էր. «Նրանք (զինվորները) զոհվել են դեմքով դեպի թշնամին կանգնած, իսկ այդ ոչ ադեկվատ, պաթետիկ Դոնալդ Թրամփը չի կարողացել նույնիսկ անտեսել անձրևն ու հարգանքի տուրք մատուցել նահատակներին»:

Նշվում է, որ բազմաթիվ ամերիկացի քաղաքական գործիչներ, ինչպես նաև վետերաններին միավորող ընկերակցություններ ու կազմակերպություններ քննադատել են Թրամփի որոշումը:

Հիշեցնենք, որ Առաջին աշխարհամարտի ավարտի 100-ամյակի կապակցությամբ Ֆրանսիայում ընթացող պաշտոնական միջոցառումների շրջանակում նոյեմբերի 11-ին Փարիզ էին ժամանել աշխարհի բազմաթիվ պետությունների ղեկավարներ, այդ թվում՝ ԱՄՆ նախագահ Դոնալդ Թրամփը: