Կարեն Քոչարյան. «Շանսերը ավելի թուլացան՝ գրեթե հավասարվելով զրոյի»
Մամուլ
Պերմանենտ հեղափոխությունից վատ բան չկա:Ազգային ժողովն իրավունքի ուժով արձակվեց, իսկ Կենտրոնական ընտրական հանձնաժողովն իր արտահերթ նիստում հաստատեց 2018թ. դեկտեմբերի 9–ին կայանալիք ԱԺ արտահերթ ընտրությունների նախապատրաստման և անցկացման հիմնական միջոցառումների ժամանակացույցը: ԱԺ արձակումը, սպասվելիք արտահերթ ընտրությունների անցկացման օրը, ըստ քննարկումների, կարծիքների, ամրագրել են հեղափոխության ավարտը կամ գոնե մոտեցրել այդ ավարտին:
Քաղաքագետ Կարեն Քոչարյանն այդ առումով դեռ չի շտապում գնահատական հնչեցնել, փոխարենը մատնանշում է արդեն ընտրություններից հետո անհրաժեշտ և կարևորագույն հարցը:
Այս փուլում, ըստ քաղաքագետի, քաղաքական օրակարգը հետևյալն է. «Ստեղծել բալանս: Այսինքն՝ քաղաքական և պետական դաշտը հանել դիսբալանսից, երբ գործադիրը մի ուժ էր, Ազգային ժողովը՝ մի ուժ: Բերել բալանսի և սկսել աշխատել, այն, ինչի մասին նոյեմբերի 1–ին ասում էր վարչապետը: Նկատի ունեմ՝ խոսքից գործի անցնելը»:
Արտահերթ խորհրդարանական ընտրությունների ենք գնում գործող Ընտրական օրենսգրքով, ըստ որի՝ գործելու է ռեյտինգային համակարգը: Դիտարկմանն ու հարցին, թե այդ առումով ինչպե՞ս է գնահատում հատկապես նոր ուժերի հնարավորությունները, քաղաքագետը պատասխանեց.
«Նոր ուժերի հնարավորությունները հին օրենսգրքով շատ վատ եմ գնահատում: Ընդհանրապես հին օրենսգիրքը շատ վատ օրենսգիրք է, բայց ողբերգություն չէ, որ մնաց: Որովհետև «Քաղաքացիական պայմանագիրն», այսպես, թե այնպես, անվիճելի լիդեր է լինելու թե՛ հնով, թե՛ նորով, այսպես, թե այնպես, կանցնեին և՛ ԲՀԿ–ն, և՛ Հանրապետականը: Կարծում եմ՝ լավ կլինի, որ անցնի նաև «Լույսը»: Իսկ նոր ուժերը և հին մարդ–կուսակցությունները ինչպես հին, այնպես էլ նոր օրենսգրքով շանս չունեին: Նոր ուժերը նոր օրենսգրքով, միգուցե, շանս կունենային, որովհետև անցողիկ շեմի նվազեցում կար: Բայց ասել, որ անպայման կանցնեին նոր օրենսգրքով, ևս սխալ կլինի: Այնպես որ, այստեղ խոսքը պարզապես շանսերի մասին է: Շանսերը ավելի թուլացան՝ գրեե հավասարվելով զրոյի: Իհարկե, դա չի նշանակում, որ ոչ մի ուժ չի անցնի հին օրենսգրքով: Հնարավոր է՝ անցնի»:
Դիտարկմանը, թե այդ պարագայում արդյո՞ք չեն օգտագործի դաշինքներ կազմելու հնարավորությունը, Կարեն Քոչարյանը պատասխանեց.
«Հնարավոր է առանց դաշինքի էլ անցնեն: Դաշինքն ավելի շատ մարդ– կուսակցություններին է պետք, նոր ուժերին դաշինքներ պետք չեն»:
Ինչ վերաբերում է սպասվելիք խորհրդարանական ընտրություններում ՀՀԿ–ի հնարավորություններին և շանսերին, քաղաքագետն ընդգծեց, որ այդ կուսակցությունը հնարավորություններ կունենար թե՛ գործող, թե ԸՕ նոր օրենսգրքի անցկացման դեպքում: «Որովհետև ՀՀԿ–ն, այնուամենայնիվ, եղել է իշխանություն, ստեղծել է իր սոցիալական բազան: Որոշակի քանակությամբ մարդիկ, որոնք իրենց լավ են զգացել այդ իշխանության օրոք, հիմա կոմֆորտ զոնայից դուրս են գտնվում: Բնականաբար, նրանք իրենց ձայնը պետք է տային ՀՀԿ–ին թե՛ հին, թե՛ նոր օրենսգրքով: Չեմ ասում, որ դա շատ մեծ թիվ է կազմելու, բայց դա բավական է, որպեսզի ՀՀԿ–ն հաղթահարի անցողիկ շեմը»,–նշեց քաղաքագետը:
1
2
3
4
5
1
2
4
5
