«Բժիշկներ առանց սահմանների» միության հայաստանյան առաքելությունը նշեց իր գործունեության 30 ամյակը

Գյումրու Երիտասարդական պալատում, նոյեմբերի 2-ին, «Բժիշկներ առանց սահմանների» /ԲԱՍ/ միության հայաստանյան առաքելությունը նշեց իր գործունեության 30 ամյակը: Միջոցառումը մեկնարկեց բացառիկ ֆոտո-ցուցահանդեսով՝ կազմակերպության անցած տարիների գործունեությունը ներկայացնող: Միջոցառմանը հրավիրված են ԲԱՍ-ի ներկա և նախկին անձնակազմը, շահառուները, գործընկերները, ինչպես նաև Գյումրու բնակիչները:
«Արմենպրես»-ի հետ ունեցած զրույցի ժամանակ ԲԱՍ հայաստանյան առաքելության ղեկավար Իզաբել Բրետոն փաստեց՝ կազմակերպությունը Հայաստան է եկել Սպիտակի ավերիչ երկրաշարժից 3 օր անց՝ ցուցաբերելով բժշկա-հոգեբանական աջակցություն և հումանիտար օգնություն: «Կազմակերպությունն առաջին անգամ էր հայտնվել նման ծավալների աղետի ենթարկված վայրում: Մեծ հոգեբանական օգնություն էր կազմակերպության կողմից ցուցաբերվում հատկապես երեխաներին: Գյումրիում ԲԱՍ-ը 3 տարի գործեց և այն բանից հետո, երբ արդեն շատ այլ կազմակերպություններ եկան Գյումրի՝ օգնության, ԲԱՍ-ը այլ ծրագրեր սկսեց իրականացնել արդեն Գյումրիից դուրս»,-նշեց Իզաբել Բրետոն : 
Գյումրու քաղաքապետ Սամվել Բալասանյանը, ողջունելով ներկաներին, իր խոսքում կարևորեց «Բժիշկներ առանց սահմանների» միության գործունեությունը, ապա խոսեց 1988թ.-ին Լենինականում նրանց ծավալած աշխատանքների մասին: 
«Մեր կազմակերպության պատմության մեջ Հայաստանում 1988 թվականից հետո իրականացվող ծրագիրը համարվում է ամենամեծը: Մի քանի շաբաթների ընթացքում կազմակերպության 72 բժիշկ-մասնագետ ժամանեց Հայաստան, հատուկ դեպի Գյումրի իրականացվեց 7 չվերթ, 250 տոննա դեղորայք և այլ բժշկական սարքավորում բերվեց: Նույնիսկ մինչև օրս ԲԱՍ –ի իրականացրած ծրագրերից, Գյումրիում իրականացվածն ամենածավալունն էր՝ սա են փաստում այդ օրերին Հայաստանում գտնվող բժիշկներն ու փրկարարները: Ի դեպ, առաջին օրերին մեր բժիշկները վիրահատություն էին իրականացնում ու ապրում վրաններում: Պատմում են, որ առաջին օրերին շատ դժվար է եղել, քաոս՝ քաոս էր ոչ միայն տեղի ունեցածից, այլ նաև օգնության ժամանած կազմակերպություններից»,-«Արմենպրես»-ին տեղեկացրեց ԲԱՍ Ֆրանսիայի կազմակերպության նախագահ Մկրտիչ Թերզյանը:
1988թ.-ին Գյումրիում ցուցաբերած մարդասիրական օգնության, «Բժիշկներ առանց սահմանների» հայաստանյան միության առաքելության 30-ամյակի կապակցությամբ Գյումրու քաղաքապետի շնորհակալագրերով պարգևատրվեցին «Բժիշկներ առանց սահմանների» կազմակերպության հոգեբույժ Մարի-Ռոզ Մորոնին, «Բժիշկներ առանց սահմանների» կազմակերպության արտակարգ իրավիճակների բաժնի ներկայացուցիչ Մարի-Քրիստին Ֆերիրին, «Բժիշկներ առանց սահմանների» Ֆրանսիա կազմակերպության նախագահ Մկրտիչ Թերզյանը:
ԲԱՍ-ը աշխարհի խոշորագույն բժշկական մարդասիրական կազմակերպություններից մեկն է, որը Հայաստանում ծավալած գործունեության 30 տարիների ընթացքում իրականացրել է տարբեր ծրագրեր: ԲԱՍ-ը ժամանել է Հայաստան 1988թ. Սպիտակի ավերիչ երկրաշարժից մի քանի օր անց՝ շտապ բուժօգնություն տրամադրելով տուժած բնակչությանը, այնուհետ Լեռնային Ղարաբաղում բացել է ծրագիր՝ աջակցելու պատերազմից տուժած ազգաբնակչությանը, իսկ ավելի ուշ բացել է նաև տուբերկուլոզի ծրագիր: 
«Բժիշկներ առանց սահմանների» ֆրանսիական կազմակերպությունը 2005 թվականից Հայաստանում իրականացնում է տուբերկուլոզի դեմ պայքարի ծրագիր, մասնավորապես` տուբերկուլոզի դեղորայքակայուն ձևերի բուժման ուղղությամբ: Միևնույն ժամանակ, կազմակերպությունն իրականացնում է կալանավայրերում գտնվող դեղորայքակայուն տուբերկուլոզով հիվանդների բուժում: Կազմակերպությունն օժանդակում է Տուբերկուլոզի ազգային գրասենյակին` Երևանից դուրս` Արմավիրի, Շիրակի, Լոռու, Կոտայքի և Արարատի մարզերում դեղորայքակայուն տուբերկուլոզով հիվանդների բուժման գործում: Դեղորայքակայուն տուբերկուլոզի բուժման ծրագիր է իրականացնում նաև Լեռնային Ղարաբաղի Հանրապետությունում:

Արմենուհի Մխոյան