Լարված իրավիճակ Հանրապետության հրապարակում. Ոստիկանները բերման ենթարկեցին Անդրիաս Ղուկասյանին

NEWS.am-ը գրում է.

Հանրապետության հրապարակից քիչ առաջ ոստիկանները բերման ենթարկեցին «Ոտքի, Հայաստան» նախաձեռնության անդամ Անդրիաս Ղուկասյանին եւ նախաձեռնության երեք այլ անդամների`Սերգեյ Կյուրեղյանին, Դավիթ Հովհաննիսյանին եւ Անդրանիկ Մանուկյանին՝ ոստիկանի օրինական պահանջին չենթարկվելու պատճառաբանությամբ, բերման է ենթարկվել նաև պապիկը, որին ապտակել էր ոստիկանը:։

NEWS.am–ի թղթակիցը հաղորդում է, որ նրանք բերման են ենթարկվել, քանի որ հրաժարվել են Հանրապետության հրապարակ բերած մեքենայի անվադողերը հեռացնել տարածքից։

Նախաձեռության անդամները չեն հեռացրել անվադողերը` ասելով, որ դա բեմ կառուցելու համար է։

Նախաձեռնության անդամների խոսքով` ոստիկանները տարել են նաեւ բերման ենթարկվածների անձնական իրերը։

Երեւանի փոխոստիկանապետ Վալերի Օսիպյանը հայտարարել է, թե իրենք տեղեկություններ ունեին, որ այդ անվադողերը պետք է այրեին Հանրապետության հրապարակում:

Հիշեցնենք, որ հուլիսի 27-ից Հանրապետության հրապարակում նստացույց են սկսել «Ոտքի Հայաստան» շարժման մասնակիցները: Նրանք պահանջում են չեղարկել էլեկտրաէներգիան 6,93 դրամով թանկացնելու որոշումը, ՀԾԿՀ անդամների հրաժարականները եւ ՀԷՑ–ի ազգայնացում։ Նախաձեռնությունը այսօր հանրահավաք էր հրավիրել Հանրապետության հրապարակում։