Կառավարությունը որևէ կերպ սահմանափակված չէ. եթե ԱՄՆ-ից մեզ համար շահավետ առաջարկ կլինի սպառազինություն ձեռք բերելու՝ կքննարկենք. Փաշինյան
Հասարակություն
Կառավարությունը որևէ կերպ սահմանափակված չէ, եթե ԱՄՆ-ից սպառազինություն ձեռք բերելու շահավետ առաջարկ կլինի մեզ համար՝ մենք կքննարկենք. լրագրողների հետ ճեպազրույցում ասաց ՀՀ վարչապետի ԺՊ Նիկոլ Փաշինյանը՝ անդրադառնալով ԱՄՆ նախագահի ազգային անվտանգության հարցերով խորհրդական Ջոն Բոլթոնի՝ Հայաստանի նոր իշխանություններին ամերիկյան սպառազինություն ձեռք բերելու առաջարկի մասին: «Եթե շահավետ առաջարկ կլինի մեզ՝ մենք կքննարկենք»,– ասաց նա։
Ինչ վերաբերում է Բոլթոնի հայտարարությանը, թե ընտրություններից հետո, հաշվի առնելով Փաշինյանի բարձր վստահությունը, որոշիչ քայլեր կլինեն Ղարաբաղի հարցում, Փաշինյանը նշեց, որ ամեն մեկը կարող է խոսել ինքն իր անունից: « Ջոն Բոլթոնը խոսում է իր անունից, և Ջոն Բոլթոնը, և ընդհանրապես որևէ մեկը չի կարող խոսել իմ անունից»,-ասաց նա:
Դիտարկմանը, թե Բոլթոնն ասում էր, որ քանի որ վարչապետն ունի բարձր վստահություն, դա հնարավորություն կտա առաջնորդելու հիմնախնդրի լուծումը, Նիկոլ Փաշինյանը նշեց, որ հնարավորություն կտա, բայց դա չի կարող լինել որևէ լուծում, որը ընդունելի չի լինի հայ ժողովրդի համար:
«Այս հարցում եկեք պայմանավորվենք, որովհետև մինի փոթորիկներ են էլի կազմակերպում համացանցում, չի կարող լինել լուծում, որ ընդունելի չէ հայ ժողովրդի, ՀՀ-ի ժողովրդի, Արցախի ժողովրդի համար: Իսկ հարցի գլոբալ կարգավորման համար, հասկանալի է, որ այդ լուծումը պետք է ընդունելի լինի նաև Ադրբեջանի ժողովրդի համար, և մենք պետք է լինենք հրապարակային»,-ասաց նա և նշեց, որ նախկին իշխանություններին թվում է, որ եթե իրենք կուլիսներում արդեն որոշում էին ամեն ինչ և փորձում էին ժողովրդի հետևում ամեն ինչ անել, նոր կառավարությունը ևս այդպիսի գործելակերպ պետք է ունենա:
Հարցին, թե Վինեննայի և Սանկտ-Պետերբուրգի պայմանավորվածությունները մոռացվե՞լ են արդյոք, Նիկոլ Փաշինյանը հերքեց: «Ցանկացած հանդիպման ժամանակ ես խոսում եմ այդ պայմանավորվածությունների մասին, բայց ի տարբերություն նախորդ իշխանությունների՝ մեզ հաջողվել է կոնկրետ պայմանավորվածություններ ձեռք բերել, այդ թվում և զինդադարի շատ թե քիչ պահպանման ուղղությամբ»,-ասաց նա:
Դիտարկմանը, թե նման պայմանավորվածությունը որակվում է ստվերային, Նիկոլ Փաշինյանը նշեց, թե այդ դեպքում պետք է ցույց տալ մի դեպք, որ ՀՀ-ի որևէ ղեկավար հանդիպել է Ադրբեջանի որևէ ղեկավարի հետ, հետո եկել նստել ուղիղ եթերում ասել է, թե ինչ են պայմանավորվել:
«Ասել եմ, որ ուղիղ կոմունիկացիա պետք է լինի, և երբ որ կոմունիկացիան հաստատվել է, ես տեղեկացրել եմ, որ կոմունիկացիան հաստատված է, այսինքն` այդ ի՞նչ ստվեր է, էլ ի՞նչ պետք է լիներ»,-ասաց նա և նշեց, որ կողմերը հիմնականում պահպանում են պայմանավորվածությունը:
Ինչ վերաբերում է պաշտպանության նախկին նախարար Վիգեն Սարգսյանի գնահատականին, որ արտաքին քաղաքականությունում սխալներ են թույլ տվել, Փաշինյանը պատասխանեց. «Վիգեն Սարգսյանը սովոր է, որ ՀՀ իշխանությունները պետք է ծուռ վզով և կիսածնկած վիճակում արտաքին քաղաքականություն վարեն, և եթե դա է իրենց պատկերացրած արտաքին քաղաքականությունը, ուզում եմ հիասթափեցնել Վիգեն Սարգսյանին և իր բոլոր գործընկներին, ՀՀ իշխանությունները վարում են շատ հստակ, ինքնավստահ ու արժանապատիվ երկրին վայել, արժանապատիվ քաղաքականություն»,-եզրափակեց նա:
1
2
3
4
5
5
4
