“Եվան հիանալի մարդ է ու հիանալի արտիստ, սակայն խիստ ուսուցիչ” Եվա Ռիվասի աշակերտը Հայաստանի ձայնը նախագծից անկեղծանում է իր ուսուցչի մասին

Արման Գրիգորյանը ֆեյսբուքյան իր էջում գրում է.

Հարց.- Տիգրան, քեզ մենք որպես քո ապագա կամ նույնիսկ ներկա հանդիսատես մեծ պլանում տեսանք Հայաստանի ձայնը նախագծում: Ու կարելի է ասել, երգարվեստը քեզ տարավ: Սակայն նախնական զրույցի ժամանակ, պարզվեց, որ դու քո տարիքի համեմատ բավական լավ առաջընթաց ես ունեցել նաև նկարչության մեջ: Իսկ ինչու չնախընտրեցիր նկարչությունը:

-Չի կարելի ասել, որ երգարվեստը ինձ տարավ այն իմաստով, որ ես թողեցի նկարչությունը: Ես սովորում եմ ՃՇԱՀ-ի դիզայնի բաժնում, իսկ դա արդեն իսկ ուղղակի կապված է նկարչության հետ: 

Հարց .- Ասում են, որ նկարչությունն էլ է երգարվեստ ու այս դեպքում էմոցիաներ, ապրումներ և այլն արտահայտվում է վրձնի ներկի ու գույնի միջոցով: Ինչպիսի զուգահեռներ կանցկացնես երգի ու նկարչության միջև 

- Իմ կարծիոքվ, արվեստի այս երկու ճյուղերը կապված են միմյանց: Փորձեմ պատասխանել սեփական կյանքիս օրինակով: Երեխա ժամանակ, երբ դեռ հաճախում էի երաժշտական դպրոց, ուսուցչուհիս` Աննա Մուսայելյանը միշտ ասում էր` Տիգրան գնա ու նկարի քո երգը, թե ինչ ես պատկերացնում: Ես շատ երգեր այդպես եմ ճիշտ հասկացել ու կարողացել ճիշտ վերարտադրել այն էմոցիոնալ դաշտը, ապրումները, որ դրված է այդ երգի մեջ 

Հարց.- Հայաստանի ձայնում, դու ունեցել ես մի մարզիչ, ում հայաստանյան հասարակությունը ոչ միշտ է ճիշտ հասկացել, առավել ևս հաճախ միանշանակ գնահատական չի էլ տվել. խոսքս Եվա Ռիվասի մասին է: Որպես այսպես ասենք, նրա աշակերտը, ինչ կասես, արդյոք ով էր "մեղավոր" այս ամենում, մենք, այսինքն հասարակությունը, որ պատրաստ չէր տեսնելու ու ընկալելու համարժեք կերպով Եվա Ռիվաս կերպարը, թե հենց Եվան էր մեղավոր որ գուցե և ժամանակավրեպ կամ անպատեհ կերպար էր փորձում մատուցել հայաստանյան հասարակությանը 

- Դիտարկումը շատ ճիշտ էր: Եվան այն մարդն է ու այն կերպարը, որին հայաստանյան հասարակությունն իրոք ոճ միշտ է կարողանում ճիշտ ընկալել, հասկանալ: Դժվարանում եմ այստեղ “մեղավորներ” փնտրել ու մատնանշել: Կարող եմ միայն ասել, որ Եվան այն մարդն է, ով ազատ է բառիս ամենալայն իմաստով և երբեք իր ներսում չի պահում այն, ինչ մտածում է կամ զգում: Ինչպես նախագծի շրջանակներում, այնպես էլ դրանից դուրս մեր շփման արդյունքը եթե ի մի բերեմ, կարող եմ ասել` հիանալի մարդ է, ու արտիստ, սակայն չափազանց ազատ է. նրան ոչ ոք չի կարող ասել, դու սա ճիշտ արեցիր, սա սխալ: 

Հարց .- Շարունակելով Հայաստանի ձայնում քո մասնակցության թեման: Առիթ ունեցար բնականաբար դասերից ու պարապմունքներից դուրս նաև շփվելու քո ուսուցչի կամ մարզչի հետ: Ինչպիսին կգնահատես նրան կյանքում և ինչպես պարապմունքների ընթացքում: Այն Եվան, որին մենք տեսնում էինք որպես կերպար, ինչ նմանություններ ու ինչ տարբերություններ ունի այն Եվայի հետ, որին ճանաչեցիր դու

- Ասեմ, որ շատ հպարտ եմ, որ Եվայի նման մարզիչ կամ ուսուցիչ եմ ունեցել նախագծում: Կարող եմ բնութագրել` հիանալի մարդ ու հիանալի արտիստ, սակայն խիստ ուսուցիչ: 

Հարց - Նախնական զրույցի ժամանակ նշեցիր, որ Հայաստանի ձայնը քեզ նաև տվեց ճանաչում: Դու քեզ ճանաչված մարդ համարում ես: Որն է ճանաչվածության քո սահմանումը:

- Ինչ որ իմաստով այո, կարելի է ասել, մի քիչ ճանաչված եմ: Ճանաչման իմ սահմանումը գուցե և կրկնի հազարավորների համանման սահմանումը. ճանաչված ես, երբ քեզ գրում են լրիվ անծանոթ մարդիկ ու ասում, որ քեզ շատ են սիրում կամ հավանում, կամ քո համար են քվեարկել, կամ ափսոսում են, որ լքել ես նախագիծը և այլն: 

Հարց- Ասում են ճանաչումը ոսկե վանդակ է ճանաչված մարդու համար: Համամիտ ես արդյոք այդ մտքին:

- Գիտեք, այս հարցին կպատասխանեմ այն ժամանակ, երբ այդ աստիճան ճանաչված լինեմ, քանի որ իմ կարծիքով արտիստը հայտնվում է այդ ասված ոսկե վանդակում իր ճանաչվածության գագաթնակետում: 

Հարց .- Առաջիկայում ինչ ծրագրեր կան նախատեսված Տիգրանի կողմից: Ինչ անակնկալների սպասենք Տիգրանից

-Ընդամենն ասեմ այսքանը` տեսահոլովակ, նոր երգեր ու մեկ զուգերգ: Մնացածն իր ժամանակին` առանց փակագծերը բացելու: