Ալեքսանդր Գրիգորյան. Ջիբրալթարին պարտվելն ավելի դժվար է, քան Ջիբրալթարի նեղուցը լողալով անցնելը

«Լուչ-Էներգիայի», «Անժիի», «ԲՄԱ-Խաբարովսկի», Մոսկվայի «Արարատի» և «Տոսնոյի» նախկին գլխավոր մարզիչ Ալեքսանդր Գրիգորյանը, ով նաև Bookmakers Rating-ի փորձագետ է, իր կանխատեսումն է արել Ազգերի լիգայի 4-րդ տուրի` Հայաստան-Մակեդոնիա խաղի վերաբերյալ:

Հայ մասնագետը նաև կարծիք է հայտնել նախորդ տուրում մեր ընտրանու` Ջիբրալթարից կրած անսպասելի պարտության մասին (0:1).

«Վերջին խաղում հայերը գերազանցեցին բոլոր պատկերացնելի ռեկորդները, քանի որ տանը Ջիբրալթարին պարտվելն ավելի դժվար է, քան Ջիբրալթարի նեղուցը լողալով անցնելը:

Անկեղծ ասած, նման պարտությունից  հետո ես գլխավոր մարզչին կստիպեի լողալով անցնել գոնե Սևանը: Ես սարսափելի զայրացած եմ այդ արդյունքի պատճառով:

Հասկանալի է, որ չի կարելի ամեն բան բարդել մարզչի վրա, քանի որ ֆուտբոլիստները խաղում են իրենց հայրենիքի համար և այդպիսի արդյունքները պարզապես անթույլատրելի են:

Հասկանում եմ, որ դու 90 րոպեի ընթացքում 15 գոլային պահ ես ստեղծում, բայց ինչ-որ հրաշք քեզ խանգարում է: Առավել ևս, որ Հայաստանի հավաքականի կազմում հիանալի ֆուտբոլիստներ են ընդգրկված: Հարձակման գծում պոտենցիալն այնքան մեծ է, որ կարող էին Ջիբրալթարին 10 գոլ խփել:

Հնարավոր է` ես թերագնահատում եմ Ջիբրալթարին, բայց ես այլևս չէի ցանկանա նույնիսկ արտաբերել այդ անունը:

Ինչ վերաբերում է Մակեդոնիային, ապա կարծում եմ, որ այս անգամ կհաղթենք նրանց: Մեկ գոլի առավելությամբ: Այլևս չեմ ցանկանում որևէ այլ կանխատեսման մասին մտածել»,- ասել է Ալեքսանդր Գրիգորյանը:

Հիշեցնենք` Հայաստան-Մակեդոնիա հանդիպումը կկայանա այօր` հոկտեմբերի 16-ին Վ. Սարգսյանի անվան «Հանրապետական» ստադիոնում և կմեկնարկի ժամը 20:00-ին: