Տավուշում որսի ժամանակ ընկերոջը սպանած Խանաղյանին մեղադրանք է առաջադրվել

NEWS.am-ը գրում է.

Տավուշի մարզի Նորաշեն գյուղում օգոստոսի 11-ին որսի ժամանակ հնչած կրակոցների եւ 58-ամյա Արամ Աթոյանի սպանության գործով մեղադրանք է առաջադրվել նրա ընկերոջը՝ Ա. Խանաղյանին: Այս մասին NEWS.am-ի թղթակցին հայտնեցին Քննչական կոմիտեի մամուլի ծառայությունից:

Խանաղյանին մեղադրանք է առաջադրվել Քրեական օրենսգրքի 109-րդ հոդվածի 1-ին մասով (անզգուշությամբ մահ պատճառելը) եւ 294-րդ հոդվածի 2-րդ մասի 2-րդ կետով (ապօրինի որս):

Գործով քննիչը միջնորդություն էր ներկայացրել դատարան՝ Խանաղյանի նկատմամբ խափանման միջոցը կալանք ընտրելու վերաբերյալ, սակայն դատախազը դեմ է արտահայտվել եւ միջնորդությունը մերժվել է:

Ավելի վաղ ՔԿ մամուլի ծառայությունը հայտնել էր, որ Տավուշի մարզի բնակիչներ 1971թ. ծնված Ա.Խանաղյանը եւ 1957թ. ծնված Ա.Աթոյանն օգոստոսի 11-ին վաղ առավոտյան «Մնգլտեղեր» կոչվող հանդամաս են գնացել՝ փորսուղ տեսակի կենդանու որս կատարելու համար։ Նախնական վարկածի համաձայն՝ ապօրինի որսի ժամանակ Խանաղյանը կրակ է արձակել փորսուղի ուղղությամբ, որն անզգուշությամբ դիպել է սայթաքելու հետեւանքով այդտեղ հայտնված, իր հետ որս կատարող Ա.Աթոյանի նստատեղին, որի հետեւանքով վերջինս ստացած հրազենային մարմնական վնասվածքներից մահացել է: