Մեծ կորուստ է հայ և ֆրանսիացի ժողովրդի համար, սա համամարդկային կորուստ է. վարչապետը` Շառլ Ազնավուրի մասին
ՀասարակությունԱհավոր բոթ լսեցինք այսօր, կյանքի 94-րդ տարում մահացել է հայ ժողովրդի մեծագույն զավակներից մեկը` Շառլ Ազնավուրը: Ֆեյսբուքյան իր էջի ուղիղ եթերում ՀՀ վարչապետ Նիկոլ Փաշինյանն անդրադարձավ աշխարհահռչակ ֆրանսահայ շանսոնյե Շառլ Ազնավուրի մահվանը և իր ցավակցությունը հայտնեց:
«Դժվար է հավատալ, որ մարդը, ով դարաշրջան, պատմություն, սեր է կերտել և անմնացորդ ծառայել է սեփական ժողովուրդներին, քանի որ նա ասում էր, որ հարյուր տոկոսով հայ եմ, հարյուր տոկոսով ֆրանսիացի, մարդ, ով 80 տարի բեմական գործունեությամբ հիացրել և ջերմացրել է հարյուր միլինավոր մարդկանց, այսօր այլևս մեզ հետ չէ: Սա իսկապես ցավալի, սգալի օր է մեր ժողովրդի, մեր երկրի պատմության համար, մահացել է Հայաստանի ազգային հերոս Շառլ Ազնավուրը»,-ասաց նա:
Վարչապետն ասաց, որ իր վշտակցությունը, ցավակցությունն է հայտնում Հայաստանի Հանրապետության անունից, հայ ժողովրդի անունից բոլորին, ցավակցում է հայ ժողովրդին, Ֆրանսիայի ժողովրդին, ամբողջ աշխարհում ապրող նրա երկրպագուներին, նրա արվեստի սիրահարներին:
«Սա իսկապես մեծ կորուստ է հայ ժողովրդի համար, Ֆրանսիայի ժողովրդի համար, և սա համամարդկային կորուստ է, որովհետև նա մի մարդ է, ով ստեղծել է ոչ միայն ազգային, այլև վերազգային, համամարդկային արժեքներ, և այդ արժեքները դեռ երկար դարեր կուղեկցեն մարդկությանը դեպի սեր, դեպի համերաշխություն և կբարձրացնեն մարդկությունը, կջերմացնեն նրանց հոգիները և մարդկանց կմղեն դեպի առաքելություն»,-ասաց վարչապետը:
1
2
3
4
5
1
2
3
4
5
5
