2019 թ. բյուջեն գնահատում եմ իներցիոն, դա նախկին կառավարության բյուջեի ուրվականն է. Ն. Փաշինյան

2019 թ.-ի բյուջեն գնահատում եմ իներցիոն, դա նախկին կառավարության բյուջեի ուրվականն է:

Այս մասին այսօր «Կամար» բիզնես կենտրոնում շրջայցից հետո լրագրողների հետ զրույցում ասաց ՀՀ վարչապետ Նիկոլ Փաշինյանը:

«Դա դեռևս մեր կառավարության բյուջեն չէ: Ինչ-որ առումով նախկինից եկած իներցիայի բյուջեն է, և մեր տրամադրվածությունն այն է, որ նաև հընթացս այս բյուջեն պետք է շատ լրջագույն փոփոխությունների ենթարկվի: Մենք դեռ այդ բյուջեի վրա աշխատելու ենք»,- նշեց վարչապետը:

Նրա խոսքով՝ այդ թվում աշխատանքներ են տարվելու աշխատավարձերի, թոշակների բարձրացման ուղղությամբ:

Նիկոլ Փաշինյանը նաև նկատեց, որ այսօր բազմաթիվ խնդիրներ կան կառավարման արդյունավետության, պետական համակարգի կառուցվածքի տեսանկյունից.

«Մենք պետք է ամեն ինչ անենք՝ արդյունավետությունը բարձրացնելու համար»,-շեշտում է նա:

Հիշեցնենք, որ Կառավարությունը սեպտեմբերի 27-ի նիստին հավանություն տվեց «ՀՀ 2019 թ. պետական բյուջեի մասին» ՀՀ օրենքի նախագծի վերաբերյալ Կառավարության օրենսդրական նախաձեռնությանը, որով նախատեսված է 4,9% տնտեսական աճ և 2,7% գնաճ:

Վարչապետը նաև անդրադարձավ քաղաքական և փորձագիտական շրջանակների այն կարծիքներին, որ Կառավարության գործելաոճի վերաբերյալ օտարերկրյա ներդրողները լուրջ կասկածներ կարող են ունենալ: Մասնավորապես, խոսքը «Լիդիան Արմենիայի», «Վեոլիա ջրի», «Հարավկովկասյան երկաթուղիների» նկատմամբ կատարված գործողությունների մասին է:

«Փարիզում ես հանդիպել եմ «Լիդիանի» տնօրենների խորհրդի նախագահի հետ, հանդիպել եմ «Վեոլիա» ջրի տարածաշրջանային տնօրենի հետ, ՀԿԵ-ում ստեղծված իրավիճակը քննարկել եմ ՌԴ նախագահի հետ, և կարող եմ ասել, որ Ռուսաստանի իշխանությունները լիարժեք աջակցում են հնարավոր չարաշահումների դեմ մեր պայքարին: Նույնը վերաբերում է նաև «Լիդիանին» և «Վեոլիա ջրին»:

Սին են բոլոր այդ փորձերը: Օրինակ՝ ասում են՝ եթե «Հարավկովկասյան երկաթուղիների» հետ կապված ինչ-որ գործ է հարուցվել, դա ռուսական ներդրումների դեմ է: Կամ նա ֆրանսիական, մյուսը բրիտանական ներդրումների դեմ է: Բացարձակապես այդպես չէ, դա սխալ և անտեղի մեկնաբանություն է: Մենք շատ կարևորում ենք օտարերկրյա ներդրումները, բայց շատ կարևոր պայման է, որ բոլորը տեսնեն, որ Կառավարություն-բիզնես հարաբերությունները ազնիվ են, կանխատեսելի են»,- ասաց Ն. Փաշինյանը:

Վրաստանի կառավարության որոշմամբ արգելվելու էր ցամաքային ճանապարհով Հայաստան ցորենի ներկրումը, սակայն այն հետաձգվեց մինչև 2019 թ.: Այս առնչությամբ վարչապետ Փաշինյանը նշեց.

«Վրաստանի վարչապետը շատ գործնական, կոնկրետ մարդ է: Նրա հետ այս առումով շատ հեշտ է աշխատել փաստարկների դաշտում, և ես համոզված եմ, որ մենք կգտնենք այնպիսի լուծում, որը հացի գնի վրա արհեստական ազդեցություն չի ունենա: Մենք այդ պայմանավորվածությունը, ըստ էության, արդեն ունենք: Ուզում եմ իմ շնորհակալությունը հայտնել Վրաստանի վարչապետին, որ մեր պայմանավորվածությունները 100 տոկոսանոց ճշգրտությամբ պահվել են»: