Կառավարությունը մարզերում ներդրումներ կիրականացնի

Մարինա Ներսեսյանը ֆեյսբուքյան իր էջում գրում է .

Այսօր կառավարությունը սոցիալական աջակցություն ստացող սահմանամերձ համայնքների ցանկ է ներառել Արարատի մարզի «Պարույր Սևակ» համայնքը: Քանի որ այս համայնքն ունի մարտական գործողությունների հետևանքով չօգտագործվող հողատարածքներ, այնտեղ տնտեսական գործունեությունը նույնպես կիրականացվի արտոնյալ պայմաններով:

Հիշեցնեմ, որ այս տարվա հունվարի 1-ից ուժի մեջ է մտել «Սահմանամերձ գյուղական համայնքներում իրականացվող գործունեությունը հարկերից ազատելու մասին» ՀՀ օրենքը, որը սահմանում է կառավարության կողմից հաստատված ցանկում ընդգրկված բոլոր սահմանամերձ համայնքների վարչական սահմաններում գործող բիզնեսի համար հարկային արտոնություն: Այդ համայքներում իրականացվող ինչպես առևտրային, այնպես էլ կազմակերպվող արտադրական գործունեությունը, դրանից ստացվող եկամուտները և արտադրական արդյունքի իրացումը ազատվում է բոլոր տեսակի հարկերից: Հնարավոր չարաշահումները կանխելու նպատակով մշակվել են լրացուցիչ մեխանիզմներ: Ակնկալվում է, որ սահմանվող արտոնությունները կնպաստեն ներդրումային հոսքերին, նոր աշխատատեղերի ստեղծմանը և որպես հետևանք՝ տնտեսական կյանքի աշխուժացմանը:

Նշեմ, որ այս տարվա հունվարի 1-ից գործում է նաև կառավարության կողմից հաստատված 32 համայնքներին սոցիալական աջակցության տրամադրման կարգը: Այդ համայնքներն են՝ Արարատի մարզում՝ Երասխ, Գեղարքունիքի մարզում՝ Վահան, Ճամբարակ, Վայոց ձորի մարզում՝ Խաչիկ, Խնձորուտ, Սերս, Նոր Ազնվաբերդ, Բարձրունի, Տավուշի մարզում՝ Ներքին Կարմիր աղբյուր, Ոսկեվան, Չորաթան, Կողբ, Վազաշեն, Բերքաբեր, Չինարի, Արծվաբերդ, Ծաղկավան (Իջևանի շրջ.), Մոսեսգեղ, Դովեղ, Պառավաքար, Բերդավան, Բարեկամավան, Կոթի, Բաղանիս, Սարիգյուղ, Այգեձոր, Կիրանց, Այգեպար, Սևքար, Այգեհովիտ, Վերին Կարմիրաղբյուր:

Նշված համայնքների բնակիչների կողմից սպառված ջրի, ոռոգման ջրի, բնական գազի վճարումը գանձվում է հաստատված գնից նվազեցված գնով՝ 50 տոկոսի չափով, ընդ որում գանձվող գնի տարբերությունը ոլորտը սպասարկող ընկերությանը փոխհատուցվում է պետբյուջեից: Նաև սահմանվել է, որ նշված համայնքների վարչական տարածքում գտնվող, մարտական գործողությունների հետևանքով չօգտագործվող և հակառակորդի կողմից հողատարածքների գնդակոծման դեպքեր ունեցող գյուղատնտեսական նշանակության և բնակավայրերի բնակելի կառուցապատման հողատարածքների համար վճարման ենթակա հողի հարկի և այդ հողերի վրա ունեցած անշարժ գույքի գույքահարկի տարեկան գումարը հարկ վճարող անձանց անունից համապատասխան համայնքի բյուջե կվճարի կառավարությունը:

Սահմանամերձ համայնքների՝ ադրբեջանական զինված ուժերի գործողությունների հետևանքով օթևանից զրկված բնակիչներին ՀՀ կառավարությունը պետբյուջեի միջոցների հաշվին մեկամսյա ժամկետում ապահովում է համարժեք օթևանով՝ նույն համայնքի տարածքում: Սահմանամերձ համայնքներում և դրանց հարակից տարածքներում ականի պայթյունից, ադրբեջանական զինված ուժերի գործողությունների հետևանքով վիրավորված ՀՀ քաղաքացիների բուժումն իրականացվում է պետպատվերի շրջանակում, զոհված քաղաքացիների ընտանիքներին ՀՀ պետբյուջեից տրվում է միանվագ օգնություն կառավարության սահմանած կարգով՝ հուղարկավորության և գերեզմանի բարեկարգման, տապանաքարի պատրաստման և տեղադրման ծախսերի համար:

Երկրի սահմաններում պահպանվող լարվածության պայմաններում, այստեղ ապրող մարդկանց անվտանգությանը, կյանքին սպառնացող մշտական վտանգը հրամայական է դարձնում միջոցներ ձեռնարկելու նրանց կենսապայմանները թեթևացնելու, աշխատանքի հնարավորություններ ստեղծելու, արտահոսքը կանխելուն համար: