Հայկական գաթան` Գինեսի ռեկորդների գրքում. Կարապի լճում կայացած համտեսն ու միջոցառման մանրամասները

Հայկական գաթան` Գինեսի ռեկորդների գրքում. Կարապի լճի տարածքն այսօր մարդաշատ էր։ Մի շարք երևանցիներ ու զբոսաշրջիկներ եկել էին համտեսելու «Աշխարհի ամենամեծ գաթան», որը գրանցվեց Գինեսի ռեկորդների գրքում։ Ռեկորդակիր գաթան ռեկորդային արագությամբ էլ սպառվեց:

Tert.am Life–ը ներկայացնում է միջոցառման մանրամասներն ու ֆոտոշարքը։

Երևանի 2800-ամյակին ընդառաջ կազմակերպված միջոցառմանը մասնակցելու և ռեկորդը գրանցելու համար Հայաստան էր ժամանել GUINNESS WORLD RECORDS LIMITED գրասենյակի ներկայացուցիչ՝ միջազգային արբիտոր Ջոանա Մարի Բրենտը։ «Այս միջոցառումը ծրագրում էինք 11 ամիս։ Գաթայի վերջնական քաշը 368,8 կգ կազմեց», — ասաց նա։ Ռեկորդակիր գաթայի երկարությունը 60 մետր է, լայնությունը` 37։

Գաթան Գինեսի ռեկորդների գրքում ընդգրկելու գաղափարը եղել է «Երեմյան փրոջեքթս»-ինը։ «Դեռ մարտին էինք պատրաստել ամենաերկար գաթան` 40 մետր երկարությամբ, որը ևս կարող էր ռեկորդ սահմանել։ Այս անգամ որոշեցինք պատրաստել ամենամեծ գաթան և գրանցել այն Գինեսի ռեկորդների գրքում», —ասաց ընկերության գլխավոր տնօրեն Դավիթ Երեմյանը։

Հատուկ բաղադրատոմսով գաթան պատրաստվել է «Երեմյան փրոջեքթս»-ի հրուշակագործների թիմի կողմից` ընկերության շեֆ-հրուշակագործ Անահիտ Միքայելյանի ղեկավարությամբ աշխատել են 5 մասնագետ։

«Գաթան պատրաստելու նախապատրաստական աշխատանքները տևել են մոտ 10 օր, բուն պատրաստման գործընթացը` 2 օր ու գիշեր։ Գինեսն այն գրանցեց և հայկական ավանդական  գաթան ներկայացվեց ամբողջ աշխարհին»,– ընդգծեց Անահիտը։

Միջոցառմանը ներկա էր նաև Երևանի քաղաքապետի ժամանակավոր պաշտոնակատար Կամո Արեյանը, որն այս միջոցառումը քաղաքի տոնի լավագույն նվերներից մեկը որակեց։

https://www.youtube.com/watch?v=qjkH1iDtcTU