Ասադը C-300-ի տրամադրման առնչությամբ զանգահարել է Պուտինին
Միջազգային
Ռուսաստանի Դաշնության նախագահ Վլադիմիր Պուտինը հեռախոսազրույց է ունեցել իր սիրիացի գործընկեր Բաշար ալ Ասադի հետ, այդ մասին ասվում է Կրեմլի պաշտոնական կայքում:
Նշվում է, որ հեռախոսազրույցը տեղի է ունեցել Սիրիայի նախաձեռնությամբ:
«Ռուսաստանի նախագահը տեղեկացրել է Սիրիայում ռուս զինվորականների անվտանգության ապահովման և այդ երկրի հակաօդային պաշտպանության համակարգի ամրապնդման նպատակով լրացուցիչ միջոցներ ձեռնարկելու որոշման մասին»,- ասվում է հաղորդագրության մեջ:
Նշվում է, որ խոսքը C-300-ի մատակարարումների մասին է: Կողմերը նաև փոխգործակցության պատրաստակամություն են հայտնել՝ Սիրիայի տարածքային ամբողջականության ու միասնության ապահովման համար:
ՌԴ պաշտպանության նախարար Սերգեյ Շոյգուն ավելի վաղ հայտարարել է, որ Ռուսաստանն առաջիկա 2 շաբաթվա ընթացքում Սիրիային կփոխանցի С-300 ժամանակակից զենիթահրթիռային համալիրը, որն ունակ է որսալ օդային հարձակման միջոցներն ավելի քան 250 կմ հեռավորության վրա, ինչպես նաև կարող է խոցել մի քանի օդային թիրախ:
Հիշեցնենք, որ օրեր առաջ Սիրիայում ռուսական Իլ-20 է կործանվել: Այն կործանվել է «Հմեյմիմ» ավիաբազա վերադառնալու ճանապարհին՝ սիրիական С-200 հակաօդային պաշտպանության համակարգից արձակված հրթիռից: ՌԴ ՊՆ-ն Իլ-20 հետախուզական ինքնաթիռի կործանման համար մեղավոր է համարել Իսրայելի զինված օդուժին: Նման հայտարարությամբ էր հանդես եկել ՌԴ ՊՆ պաշտոնական ներկայացուցիչ Իգոր Կոնաշենկովը:
ՌԴ ՊՆ-ում կարծում են, որ F-16 կործանիչների իսրայելցի օդաչուները միտումնավոր են սիրիական զենիթային հրթիռներից թաքնվել ռուսական Իլ-20-ի հետևում:
1
2
3
4
5
1
2
3
4
5
2
