Հարուցվել է 4 քրեական գործ, բոլորը վերաբերում են ընտրակաշառք տալու դեպքերին. Դատախազություն

Հայաստանի Հանրապետության գլխավոր դատախազության մինչդատական քրեական վարույթի օրինականության նկատմամբ վերահսկողության վարչության պետի տեղակալ, արդարադատության երկրորդ դասի խորհրդական Շուշանիկ Իսրայելյանն այսօր ԿԸՀ-ում ներկայացրեց մինչև քվեարկության օրը, ինչպես նաև այդ պահի դրությամբ ստացված դիմումների, հաղորդումների և դրանց քննարկման արդյունքների վերաբերյալ տեղեկատվություն:

«Մինչև քվեարկությունն ուսումնասիրվել է մամուլի 15 հրապարակում, սոցիալական ցանցերում՝ 4 գրառում, վարչական վարույթ է ձեռնարկվել մեկ դեպքով»,-ասաց նա և նշեց՝ ընդհանուր ներկայացվել է 94 հաղորդում:

Նա հայտնեց, որ առերևույթ իրավախախտումներից 19- վերաբերել է քաղաքացու ընտրական իրավունքի ազատ իրականացմանը խոչընդոտելուն, 21-ը՝ ընտրակաշառք տալուն, 4-ը՝ քարոզչություն կատարելուն խանգարելուն:

  Նա նշեց, որ ստուգողական գործողություններ են կատարվում 82 դեպքով, 9 դեպքով նախապատրաստվում են նյութեր, իսկ 3 դեպքով հարուցվել է քրեական գործ: «Բոլորը վերաբերում են ընտրակաշառք տալու դեպքերին»,-ասաց Շուշանիկ Իսրայելյանը: Նա հավելեց, որ նշված դեպքերն ուղարկվել են քննչական ծառայություն:

Շուշանիկ Իսրայելյանն ասաց, որ արձանագրվել է ընտրությունների հետ կապված ենթադրյալ իրավախախտման 2 դեպք:

«Այսօր՝ մինչև ժամը 1-ի դրությամբ, ուսումնասիրվել է մամուլի 29 հրապարակում, սոցիալական ցանցերում քաղաքացիների կողմից կատարված 4 գրառում, վարչական վարույթ է ձեռնարկվել 1 դեպքով»,-ասաց նա և նշեց, որ, ընդհանուր առմամբ 123 հաղորդում է եղել:

«Առերևույթ իրավախախտումներից 26-ը վերաբերում են քաղաքացու ընտրական իրավունքի իրականացմանը խոչընդոտելուն, 23-ը՝ ընտրակաշառք տալուն, երկուսը՝ կրկնակի քվեարկությանը, 7-ը՝ քվեարկության գաղտնիությունը խախտելուն, մեկը լրագրողի գործունեությանը խոչընդոտելու դեպք է եղել»,-ասաց նա և նշեց, որ ևս մեկ քրեական գործ հարուցվել է ընտրակաշառքի հոդվածով: