«Պետք չէ ամպագոռգոռ արտահայտություններ անել և վերնաշապիկները պատռելով իրար խփել ասֆալտին». Արման Աբովյան

Երևանի ավագանու արտահերթ ընտրությունների ԲՀԿ ցուցակի 3-րդ համար Արման Աբովյանը, ամփոփելով քարոզարշավի ընթացքը, Pressmedia.am-ի լրագրողի հետ զրույցում նշեց, որ այս ընթացքում դրական բազմաթիվ հանդիպումներից բացի կա նաև իրեն անհանգստացնող մի երևույթ, որը շրջանցել նա  չի կարողանում:

«Խոսքը սև PR-ի մասին է, և ցավալին այն է, որ քարոզարշավի ընթացքում տարածվող ամբողջ այդ աղբը տեղափոխվեց սոցիալական ցանցեր և տեղեկատվական ցանցեր: Ցավոք, որոշ քաղաքական ուժեր կա՛մ չեն կարողանում իրենց էմոցիաները տիրապետել, կա՛մ սովոր չեն ընտրապայքարն իրականացնել քաղաքակիրթ պայմաններում: Ի՞նչ կարող եմ ասել. ով առաջինը աղբ նետեց, նույն աղբըը՝ բումերանգի էֆեկտով, հետ վերադարձավ դեպի իրեն: Իմ կարծիքով դժվար է քարոզարշավի արդյունքները մինչև ընտրությունների ավարտն ամփոփելը, քանի որ դեռ պետք է սպասենք արդյունքների»,- ասաց Ա. Աբովյանը:

Ավագանու թեկնածուն նշեց նաև, որ ԲՀԿ-ն ընտրապայքարի է դուրս եկել բաց սրտով, լայն պարզած ձեռքերով, հստակ ծրագրով ու գաղափարներով, ինչպես նաև փայլուն մասնագետներով: Ու քանի որ վերջնական խոսք ասողը երևանցին է, ուստի նա համոզված է, որ մայրաքաղաքի բնակիչներն իրենց ընտրությունը կկատարեն այն խորը գիտակցումով, թե ո՞ւմ և ինչի՞ համար են ընտրում:

«Ես վստահ եմ, որ երևանցին չի ենթարկվի շանտաժի և իր ընտրությունը չի կատարի էյֆորիայի ազդեցության տակ: Ընդհակառակը, մեր ընտրողները կկատարեն հստակ ընտրություն՝ ի շահ ապագայի ու մայրաքաղաքի կայուն ապագայի, կարևորելով այն զարգացման ուղիները, որը նրանց առաջարկում է Բարգավաճ Հայաստան Կուսակցությունը»,- ասաց Ա. Աբովյանը:

Նա նաև հավելեց, որ անցել են սուտ խոստումներ տալու և մարդկանց խաբելու ժամանակները, հիմա եկել է քրտնաջան աշխատելու և Երևանն ու երկիրը ծաղկեցնելու ժամանակը:

«Ես ևս մեկ անգամ մեր գործընկեր քաղաքական ուժերին կոչ եմ անում վերադառնալ կոնստրուկտիվ դաշտ և երևանցուն ոչ թե մոլորեցնելու փորձեր անեն, այլ ներկայացնեն այն ծրագրերը, որոնք ընտրվելու դեպքում իրականացնելու են: Եվ ամենևին էլ պետք չէ ամպագոռգոռ արտահայտություններ անել և վերնաշապիկները պատռելով իրար խփել ասֆալտին: Իսկ ընտրողներին էլ կոչ եմ անում լինել աչալուրջ և կատարել ճիշտ ընտրություն»,- խոսքը եզրափակեց Ա. Աբովյանը: