Մեկնարկել է «Շանթ-2018» զորավարժությունը. պայմանական հակառակորդի հարձակումից հետո սահմանին իրավիճակը լարվել է, կան զոհեր

Համապետական նշանակության «Շանթ-2018» զորավարժությունը պլանային բնույթի է և նպատակաուղղված է պաշտպանությանը պետության անմիջական նախապատրաստության և ագրեսիայի հետմղման ընթացքում պետական և ռազմական կառավարման մարմինների զորահավաքային նախապատրաստության, պատրաստականության բարձր աստիճանների բերման ունակության վերստուգմանը, փոխգործակցության և գործողությունների ներդաշնակության մակարդակի բարձրացմանը: Հաշվի առնելով Հայաստանի շուրջ և մերձ տարածքում ստեղծված ռազմաքաղաքական իրադրությունը՝ զորավարժության սցենարում առկա մտացածին հակառակորդը և իրավիճակը առավելապես համապատասխանեցված են իրականությանը:

ՊՆ-ում ներկայացնում են մանրամասներ՝ զորավարժության ընթացքի վերաբերյալ:

«Շանթ-2018» -ի զորավարժության սցենարային զարգացումները և օպերատիվ իրավիճակը ժամը 14:00-ի դրությամբ ներկայացրեց պաշտպանության նախարարության մամուլի խոսնակ Արծրուն Հովհաննիսյանը:

«Զորավարժության սցենարի համաձայն՝ պայմանականորեն տարածաշրջանում աշխարհաքաղաքական իրավիճակի փոփոխության և ինչ-ինչ սրացումների հետևանքով սահմանին հակառակորդը դրսևորում է ակտիվություն, հրաձգություն, կրակոցներ, պայմանական կան կորուստներ և զոհեր՝ երկուստեք:

ՀՀ ողջ տարածքում տեղի են ունենում կազմակերպչական աշխատանքներ, տեխնածին, բնածին խնդիրներ, որոնք ենթադրում են արագ արձագանքման գործընթաց, որոշակի ուժերի տեղաբաշխում:

Կա փախստականների ներհոսքի վտանգ և նրանց հետ չի բացառվում որոշակի ահաբեկչական խմբավորումների ներթափանցումը»,-ներկայացրեց Արծրուն Հովհաննիսյանը:

Նա նշեց, որ զորավարժությունները ղեկավարվում են վարչապետի կողմից:

ԱԳՆ մամուլի խոսնակ Տիգրան Բալայանը ևս ներկայացրեց իրեն վերաբաշխված գործողությունները՝ շեշտելով դրանց պայմանական լինելը: «Շտաբը մշտական գործում է առավոտյան 08:30-ից, որտեղ, ըստ ուղղությունների՝ կատարվում են համապատասխան գործողություններ, գրվում են հայտարարությունների տեքստեր, դեսպանությունները, միջազգային կազմակերպությունների ներկայացուցիչները պարբերաբար ստանում են հանձնարարականներ, տեղեկացրել ենք, որ կապի մեջ մտնեն որոշ արտաքին գերատեսչությունների հետ, ամենաբարձր մակարդակով, ինչպես օրինակ՝ ԵԱՀԿ Մինսկի համանախագահ երկրների հետ կապված»,-մանրամասնեց նա:

Տիգրան Բալայանը հավելեց, որ պայմանական դեսպաններ են կանչվել արտաքին գործերի նախարարություն, ՀԱՊԿ գործընկերները տեղեկացվել են իրավիճակի մասին: