Պետք է հասնեմ այն բարձունքին, որին պապաս ուզում էր. Վլադիմիր Արզումանյանը վթարից զոհված հոր մասին

NEWS.am-ը գրում է.

Հայաստանը «Մանկական Եվրատեսիլ 2010» երգի մրցույթում ներկայացրած եւ առաջին տեղը զբաղեցրած Վլադիմիր Արզումանյանը պատրաստվում է իրականացնել հոր բոլոր երազանքները:

NEWS.am-ի թղթակցի հետ զրույցում երգիչը, որի հայրը մահացել է օգոստոսի 13-ին վաղ առավոտյան Երասխում տեղի ունեցած սարսափելի ավտովթարի հետեւանքով, ընդամենը մեկ նախադասություն ասաց. «Պետք է հասնեմ այն բարձունքին, որին պապաս ուզում էր»:

Այլ հարցերի Վլադիմիր Արզումանյանը չկարողացավ պատասխանել, քանի որ հոգեպես վատ վիճակում էր:

Նշենք, որ Վլադիմիր Արզումանյանի հայրը երաժիշտ էր, աշխատում էր Ստեփանակերտի երաժշտական դպրոցում: Նա 42 տարեկան էր, երկու երեխա ուներ: Դեպքի պահին նա հոր հետ գալիս էր Երեւան: Վլադիմիր Արզումանյանի պապիկը դեռ գտնվում է հիվանդանոց, նրա վիճակը բավարար է:

Հիշեցնենք, որ ըստ Քննչական կոմիտեի՝ օգոստոսի 13-ին Երասխում Իրանի Իսլամական Հանրապետության քաղաքացու վարած «Մակ» մակնիշի ավտոմեքենան բախվել է 4 տարբեր՝ «Նիսսան Տեանա», «Ֆորդ Տրանզիտ», «Դաֆ» եւ «Մերսեդես Բենց 4141» մակնիշի ավտոմեքենաներին:

Պարզվել է, որ «Մակ» մակնիշի ավտոմեքենայի երկաթյա ցիստեռնը պոկվել է կցորդից, եւ դրանում առկա վառելանյութը թափվել է, որի հետեւանքով հրդեհ է բռնկվել Վահրամ Արզումանյանի վարած «Ֆորդ Տրանզիտ» մակնիշի, ինչպես նաեւ՝ ճանապարհի կողքին կայանված «Տոյոտա յարիս» եւ Երեւան քաղաքի բնակիչ Է.Արզումանյանի վարած «Մերսեդես Բենց 350 » մակնիշի ավտոմեքենաներում։

«Ֆորդ Տրանզիտ» մակնիշի ավտոմեքենայի վարորդ Վահրամ Արզումանյանը տեղում մահացել է, իսկ նրա ուղեւոր Վլ.Արզումանյանը, «Մակ» մակնիշի ավտոմեքենայի վարորդը, «Նիսսան Տեանա»  մակնիշի ավտոմեքենայի վարորդը, 4 ուղեւորները՝ Հայրապետ Գրիգորյանը, Աննա Բադալյանը, Սուսաննա Բադալյանը, «Տոյոտա Յարիս» մակնիշի ավտոմեքենայի 2 ուղեւորներն ստացել են մարմնական վնասվածքներ եւ տեղափոխվել հիվանդանոց:

Փաստի առթիվ հարուցվել է քրեական գործ: