Երեւանում առաջին անգամ անցկացվեց համաշխարհային տարածում ունեցող «Գունազարդ վազք» միջոցառումը

Երեւանում այսօր՝ օգոստոսի 15-ին, առաջին անգամ անցկացվեց աշխարհում մեծ տարածում ունեցող «Գունազարդ վազք» միջոցառումը։ Yerevan Color Run–ը մեկնարկեց Մարզահամերգային համալիրի դիմացի տարածքից, մի քանի հարյուր երիտասարդ մասնակիցները մոտ երեք կիլոմետր վազեցին Մոնթե Մելքոնյայի պողոտայով, այդ ընթացքում նրանց վրա շաղ էին տալիս գույնզգույն ներկեր:

Հայաստանում առաջին անգամ անցկացված միջոցառումը մեծ տարածում ունի Ռուսաստանում, ԱՄՆ-ում, Ավստրալիայում, Բրազիլիայում, Կանադայում, Չիլիում, Չինաստանում և Բելառուսում: Yerevan Color Run-ի նպատակներից մեկը իննամյա Գոռին ֆինանսական օգնություն ցուցաբերելն է, որը ծնվել է ողնուղեղի վնասվածքով, և չի կարողանում քայլել: Գոռի ծնվելուց հետո ծնողները հրաժարվել են նրանից և թողել հիվանդանոցում: Yerevan Color Run-ից ստացված դրամական միջոցների մի մասը հատկացվելու է «Հայ Մայրեր» բարեգործական հիմնադրամին, որը պատրաստվում է հոգալ Գոռի վիրահատության ծախսերը և նրա համար հարմարավետ սայլակ գնել:

Գումարը հավաքվել է միջոցառման գրանցման վճարներից. Երիտասարդներից յուրաքնաչյուրը մասնակցության համար վճարել է 3000 դրամ:

Գունազարդ վազքին ավանդաբար մասնակցում են ճերմակ շապիկներով, որը վազքի վերջում ամբողջովին գունազարդվում է։ Վազքի ավարտին որոշ մասնակիցներ նույնիսկ դժվարանում էին ճանաչել գունավորված դեմքերով իրենց մտերիմներին։

Մասնակիցների խոսքով` միջոցառումը հիանալի լիցքաթափման միջոց է, և շատ դրական էմոցիաներ ստացան վազքից:

Վազքուղին առաջինն անցած երեքական տղաները և աղջիկները պարգևատրվեցին մրցանակներով եւ մեդալներով:

Վազքից հետո սկսվեց երաժշտական հրավառություն և պար: Մասնակիցները պարում էին և շարունակում իրար վրա ներկեր ցանել: