Խոշոր բիզնեսը կկրի համամասնական պատասխանատվություն

Ուսումնասիրության արդյունքում կներկայացվի շուկայի կառուցվածքի և սակագների օպտիմալացման տարբերակների վերլուծություններ, վեր կհանվեն առկա խնդիրները: Այլ կերպ ասած, այս ուսումնասիրությունը պենք է պարզի ոչ միայն այն, թե արդյոք հոսանքի 6.93 դրամի թանկացո՞ւմն արդարացված է, այլ ամբողջ սակագնի հիմնավորվածությունը: Խորհրդատվության արդյունքներով հանրությունը կստանա իրեն հուզող շատ հարցերի պատասխաններ, որն անհրաժեշտ է անվստահության մթնոլորտի հաղթահարման համար: Ընկերությունը պետք է տրամադրի խորհրդատվություն համակարգի երկարաժամկետ ռազմավարական զարգացման համար:

Նիստին գործադրի ղեկավարը անդրադարձավ նաև այն փաստին, որ մինչև խորհրդատվության ավարտը կառավարությունը սակագների տարբերության մասով (6.93 դրամ) կաջակցի բնակչությանը, և դա չի վերաբերում խոշոր բիզնեսին: Պետք է փաստենք, որ ժամանակին հանրապետության նախագահը հայտարարել էր, որ կառավարությունը իր վրա է վերցնելու սակագնի տարբերությունն ազգաբնակչության համար: Վարչապետը նշեց՝ «Երբ հանրապետության նախագահն արձակուրդից վերադառնա, ես իր հետ նաև քննարկելու եմ ՓՄՁ-ներին աջակցելու խնդիրը, ովքեր ծախսում են ամսական միջին հաշվով 250 կՎտ հոսանք»:

Հաշվի առնելով այն, որ հանրապետության բյուջեի եկամուտների շուրջ 70 տոկոսն ապահովում են առաջին 1000 խոշոր հարկ վճարողները, այսինքն խոշոր բիզնեսը, այս որոշումը տրամաբանական է համամասնական պատասխանատվություն կրելու առումով: Իսկ եթե հաշվի առնենք թե ինչ անունների հետ է կապակցվում խոշոր բիզնեսը, ապա կարելի է ասել, որ որոշումը նաև արդարացի է: Իհարկե ցանկալի կլինի, որ աջակցությունը վերաբերի նաև փոքր և գերփոքր ձեռնարկություններին, որոնք տնտեսվարող սուբյեկտների ամենազգայուն հատվածն են:
Այսօր քննարկված փաստաքղքի համաձայն, աուդիտը կտևի շուրջ 4.5 ամիս, և ըստ հավանականության, բնակչությունը մինչև տարեվերջ իր կողմից սպառած էլեկտրաէներգիայի դիմաց կվճարի նախկին սակագնով՝ 41.85 դրամ/կՎտժ ցերեկվա համար և 31.85 դրամ/կՎտժ գիշերվա ժամերի համար: