Փորձաքննությամբ ավելի է հաստատվել հավանականությունը, որ մարդասպանը մեկն է` Պերմյակովը

Ավետիսյանների իրավահաջորդների ներկայացուցիչ-փաստաբանները ներկայացնում են փաստեր, ըստ որոնց` մարդասպանը Վալերի Պերմյակովն է: Ինչպես լրագրողների հետ հանդիպման ժամանակ հայտնեց փաստաբան Երեմ Սարգսյանը, դատագենետիկական փորձաքննությամբ` սվին դանակի պատյանի, բռնակի ու գոտու վրա հայտնաբերվել է Վալերի Պերմյակովի ԴՆԹ-ն` 99.99 տոկոս հավանականությամբ: «Ինչպես արդեն ներկայացվեց իմ գործընկերոջ կողմից, սվին դանակի վրա արյուն է եղել, որը ըստ գենետիկական փորձագետն երի, Արաքսյա Պողոսյանի ու Սերյոժա Ավետիսյանի կողմից է թողնված: Այդ նույն դանակի վրա Պերմյակովի ԴՆԹ-ն է ու բացարձակապես այլ ԴՆԹ չի հայտնաբերվել: Այս ամենն այս փուլում հնարավորություն է տալիս եզրակացնել, որ այդ դանակը վնասվածք պատճառելու պահին գտնվել է Վալերի Պերմյակովի ձեռքին: Սա մանրացնում եմ, քանի որ նախկինում, երբ մենք ունեինք դատաբժշկական ու դատակենսաբանական փորձաքննությունների եզրակացությունը, դրանք այնքան էլ միանշանակ չէին, որ նա է կատարել: Այս դեպքում որոշակիորեն ավելի ենք մոտենում այն փաստին, որ մեծ հավանականությամբ այդ գործողությունները նա է կատարել»,- ասաց Երեմ Սարգսյանը:

Փաստաբանը հայտնեց, որ ինքնաձիգից կրակվել է 28 փամփուշտ, ևս 2-ը եղել են ինքնաձիգում, մեկը` պահունակի մեջ, մյուսը` զենքի մեջ, որը չի կրակվել: «Զենքի մեջ եղած փամփուշտի վրա ևս եղել է Վալերի Պերմյակովի ԴՆԹ-ն: Նախնական ենթադրությամբ` այդ փամփուշտը նրա կողմից է լիցքավորվել պարունակի մեջ, որն էլ մտել է զենքի մեջ»,-նշեց փաստաբանը` շեշտելով, որ այս ամենի արդյունքում մեծանում է հավանականությունը, որ գործողությունները կատարվել են Վալերի Պերմյակովի կողմից:

Ավետիսյանների գործով տուժողների իրավահաջորդներին ներկայացնող մյուս փաստաբան Լուսինե Սահակյանն էլ, պատասխանելով հարցին, թե արդյոք, այս փաստերից ելնելով, բացառում են որևէ այլ անձի ներկայություն հանցագործության ժամանակ, նշեց. «Մենք իրավաբաններ ենք, իրավունք չունենք ոչինչ բացառել»:
Նրա խոսքով` դեպքի վայրի բնութագրից, իրականացված գործողություններից, ինչպես նաև փորձագետների կողմից ներկայացված կրակոցների ուղղություններից ելնելով` կարելի է հանգել այն մտքին, որ մեկ հոգու կողմից է կրակոց արձակվել:

«Երբ նայում ենք կրակոցների հաջորդականությանը, կարծես մեկ անձի շարժման ուղղություն լինի: Երբ դեպքի վայրում ես գտնվում ու տեսնում ես, թե որքան փոքր է տունը, հասկանում ես, որ մեկ-երկու հոգի ուղղակի իրար հետ չեն կարող տեղավորվել: Եթե ինչ-որ մեկը կրակոց արձակի, կարող է վնասել իր հետ եղած անձին: Քանի որ բավականաչափ կրակոցներ են եղել, եթե ինչ-որ մեկը լիներ, իրար կարող էին վնասել: Այսպիսով` կարող ենք ենթադրել, որ մեկ հոգու կողմից է կրակոց արձակվել: Բայց այնտեղ եղել է մեկ հոգի, թե եղել են այլ անձիք, մենք իրավաբան ենք, չենք կարող դրա մասին ասել, սա ենթադրություն է»,-ասաց Լուսինե Սահակյանը:

Ավետիսյանների ընտանիքի 6 անդամների սպանությունը տեղի է ունեցել 2015 թվականի հունվարի 12-ին՝ վաղ առավոտյան, ժամը 06:00-ի սահմաններում, նրանց մահը վրա է հասել հրազենային վնասվածքներից։ Ավետիսյանների ընտանիքից ողջ էր մնացել 6 ամսական փոքրիկը՝ Սերյոժա Արմենի Ավետիսյանը, ով կտրող-ծակող գործիքից ստացած վնասվածքներով տեղափոխվել էր բժշկական կենտրոն, այնուհետև` յոթ օր հետո մահացել: Նշանակվել էին դատաբժշկական, դատատոքսիկոքիմիական, դատաձգաբանական փորձաքննություններ: Կասկածյալին ռուս սահմանապահները հայտնաբերել են հայ-թուրքական սահմանը հատելոÖ ‚ փորձ կատարելիս եւ հանձնել 102-րդ ռուսական բազայի հրամանատարությանը:

Քրեական գործը հարուցվել է ՀՀ քրեական օրենսգրքի 104-րդ հոդվածի 2-րդ մասի 1-ին կետով (երկու և ավելի անձանց սպանությունը): Վալերի Պերմյակովին քրեական գործով որպես մեղադրյալ ներգրավելու մասին, և ՀՀ քննչական կոմիտեի քննիչները Վալերի Պերմյակովին մեղադրանք են առաջադրել Հայաստանի Հանրապետության քրեական օրենսգրքի 104-րդ հոդվածի 2-րդ մասի 1-ին կետով՝ երկու եւ ավելի անձանց դիտավորյալ սպանության համար: Վալերի Պերմյակովն ընդունել է առաջադրված մեղադրանքը: