Մերկելի՝ Հարավային Կովկաս կատարած այցի «զգայուն» կողմերը. Focus-ի անդրադարձը

Գերմանական Focus պարբերականն անդրադարձել է Գերմանիայի կանցլեր Անգելա Մերկելի՝ Հարավային Կովկաս կատարած այցին և նշել, որ սա առանձնահատուկ այց էր, քանի որ նա առաջին անգամ է այցելել այս երկրներից երկուսը՝ Հայաստան ու Ադրբեջան: 

Նշվում է, որ Մերկելի այցը մի շարք «զգայուն» կողմեր ունի, առաջին հերթին՝ այն կարող է զայրացնել Ռուսաստանի նախագահ Վլադիմիր Պուտինին, քանի որ նա ընդհանրապես չի ցանկանում հրաժարվել նախկին Խորհրդային Միության տարիներից մնացած՝ այս երեք երկրների վրա ունեցած ազդեցությունից, այնինչ երբ Մերկելը կոչ է անում «անկախանալ» ռուսական ազդեցությունից:

Մերկելի այցն Ադրբեջան, ամենայն հավանականությամբ, դուր չի գալիս Պուտինին. Մերկելի կարծիքով՝ լինելով նավթով ու գազով հարուստ երկիր ու մատակարարումներ իրականացնելով ԵՄ՝ Ադրբեջանը կարող է ազատվել Ռուսաստանից կախվածությունից:

Նշվում է, որ Մերկելի այցը «զգայուն» կողմեր ունի մասնավորապես Հայաստանի ու Ադրբեջանի միջև թշնամական հարաբերությունների հետևանքով, որոնց պատճառը Լեռնային Ղարաբաղի հակամարտությունն է: Հայաստանն Ադրբեջանի ագրեսիայից խուսափելու հարցում խոստումներ է ստանում Մոսկվայից, ինչի պատճառով էլ «փայփայում» է Ռուսաստանի հետ սերտ հարաբերությունները:

Ընդհանուր առմամբ, Մերկելի համար այս այցը նշանակում է, որ նա առերեսվում է ամենատարբեր շահերի, ռազմավարական ծրագրերի, ինչի պատճառով էլ սա բարդ ու «զգայուն» այց է: Ընդ որում՝ այցն իրենով ապացուցում է, որ Մերկելն առնվազն չի վախենում Ռուսաստանից, գրում է Focus պարբերականը։

Հիշեցնենք, որ երեկ Գերմանիայի կանցլեր Անգելա Մերկելն առաջին պաշտոնական այցով գտնվել է Հայաստանում: Այցի շրջանակում կայացել են հայ-գերմանական բարձր մակարդակի բանակցություններ՝ ՀՀ վարչապետ Նիկոլ Փաշինյանի և ԳԴՀ կանցլեր Անգելա Մերկելի գլխավորությամբ: Գերմանիայի կանցլերն այցելել է նաև Ծիծեռնակաբերդի հուշահամալիր, հարգանքի տուրք մատուցել Հայոց ցեղասպանության զոհերի հիշատակին։ Մինչ այս, գերմանացի պաշտոնյան եղել է Վրաստանում, որտեղ հանդիպումներ է ունեցել այդ երկրի իշխանությունների հետ։

Ավելի վաղ նշվել էր, որ Բաքվում քննարկվելիք կարևորագույն հարցերից մեկը կլինի Կասպից ծովից դեպի Եվրոպական Միություն բնական գազի մատակարարման ծավալների ավելացումը:

Կարող եք կարդալ նաև՝

Հայաստանում Մերկելը խուսափեց «ցեղասպանություն» բառից՝ Թուրքիային չզայրացնելու համար. Bild