Ոստիկանությունը շուտով վարորդական իրավունքի վկայականի համար կիրառելու է բալային համակարգ. Վալերիյ Օսիպյան
Հասարակություն
Ոստիկանությունը շուտով վարորդական իրավունքի վկայականի համար կիրառելու է բալային զսպող համակարգ: Այս մասին, այսօր ոստիկանապետին կից հասարակական խորհրդի նիստից հետո լրագրողների հետ զրույցում ասաց ՀՀ ոստիկանապետ ՎալերիյՕսիպյանը:
«Վարչապետի հանձնարարականով մենք դիտարկել ենք հարևան երկրների փորձը, որպեսզի կարողանանք այն կիրառել նաև մեզ մոտ: Այդ երկրներում բալային համակարգը կիրառելով՝ մահվան դեպքերը կտրուկ նվազել են: Վարորդը պետք է գիտակցի, որ բալերը կորցնելու դեպքում կարող է կորցնել վարորդական իրավունքը: Մենք ուսումնասիրել ենք նաև ոչ սթափ վիճակում ղեկին հայտնվելու նախագծի մեջ անգամ քրեական պատասխանատվության ենթարկելու հարցը»,- նշեց ոստիկանապետը:
Վալերիյ Օսիպյանը նաև անդրադարձել է ավագանու առաջիկա ընտրություններին և բացառել է ընտրակաշառքի հնարավորությունը. «Ոստիկանությունը տիրապետում է ընտրակաշառք տալու ցանկացած մեխանիզմի և խստորեն վերահսկելու է դա»,- հայտարարեց նա:
Հասարակական խորհրդի նիստից հետո Վալերի Օսիպյանը նաև խոսեց Երևանի ոստիկանապետի պաշտոնից Արտակ Պողոսյանի ազատելու իր որոշման մասին:
«Այո, Երևանի ոստիկանապետը նոր էր նշանակվել, ինքը վատ աշխատակից չէ, մեր համակարգի պրոֆեսիոնալ աշխատակիցներից մեկն է, բայց կադրային փոփոխությունները համակարգում միշտ էլ եղել են և կլինեն: Միգուցե բացթողումներ կան այնտեղ: Չենք բացառում, որ նա անցնի մեկ այլ աշխատանքի»,- նշեց նա:
Հիշեցնենք, որ ՀՀ ոստիկանապետի հրամանով՝ ոստիկանության Երևան քաղաքի վարչության պետ, ոստիկանության գնդապետ Արտակ Պողոսյանը նախօրեին ազատվել էր աշխատանքից և ուղարկվել ոստիկանության կադրային ռեզերվ:
1
2
3
4
5
5
4
