Ռուսաստանն ու Թուրքիան պայմանավորվել են բանակցել վիզային ռեժիմի դյուրացման շուրջ

Ռուսաստանն ու Թուրքիան պայմանավորվածություն են ձեռք բերել երկու երկրների միջև վիզային ռեժիմի դյուրացման հետ կապված։ Այդ մասին հայտարարել է ՌԴ արտգործնախարար Սերգեյ Լավրովն իր թուրք գործընկեր Մևլութ Չավուշօղլուի հետ ունեցած հանդիպումից հետո մամուլի ասուլիսի ժամանակ, գրում է РИА Новости գործակալությունը։

«Մենք մեր կողմից հաստատել ենք Ռուսաստանի պատրաստակամությունը Թուրքիայի քաղաքացիների առանձին խմբերի համար վիզային ռեժիմի դյուրացման շուրջ բանակցությունների անցնելու վերաբերյալ, և կզբաղվենք դրանով ամենամոտ ժամանակներում։ Պայմանավորվել ենք ձևավորել այս թեմայով պայմանավորվածությունների համար խորհրդակցությունների մեխանիզմ», - ասել է Լավրովը։
 
Նրա խոսքով՝ հարցով զբաղվող փորձագետների արձակուրդի ավարտվելուն պես նրանք հանձնարարություն կստանան ուսումնասիրել թեմայի վերաբերյալ առաջիկա քայլերը։

Նշենք, որ ՌԴ-ն որոշակի սահմանափակումներ էր մտցրել Թուրքիայի հետ վիզային ռեժիմում՝ ռուս-թուրքական լարվածության ֆոնին։

Հիշեցնենք, որ Թուրքիայի և ՌԴ-ի հարաբերությունները սրվել էին թուրք-սիրիական սահմանին տարիներ առաջ ռուսական Սու-24 ինքնաթիռի խոցումից հետո:

 Դրանից հետո Ռուսաստանը պատժամիջոցներ էր սահմանել Թուրքիայի նկատմամբ՝ արգելելով այդ երկրից մի շարք սննդամթերքի, թռչնամսի, մրգերի ներմուծումը, ինչպես նաև սահմանափակել էր ռուս զբոսաշրջիկների՝ Թուրքիայի հանգստավայրեր այցելելու հնարավորությունը։ Սակայն 2016-ի ամռան սկզբին Թուրքիայի նախագահ Ռեջեփ Թայիփ Էրդողանը կատարվածի համար ներողություն է խնդրել ռուսական իշխանություններից, ինչին հաջորդել են երկու երկրների հարաբերությունների վերականգնման աշխատանքները։