Ուզում էր տունը վերանորոգել, ամուսնանալ. ծառայակիցները` սահմանին զոհված Կարեն Հովհաննիսյանի հոգեհանգստին

NEWS.am-ը գրում է.

Երևանի Սուրբ Աստվածամայր եկեղեցում այսօր` օգոստոսի 14-ին, տեղի ունեցավ ղարաբաղա-ադրբեջանական սահմանին` մարտական հենակետում հակառակորդի գնդակից սպանված 23-ամյա Կարեն Հովհաննիսյանի հոգեհանգստի արարողությունը:

Հոգեհանգստի արարողությանը մասնակցում էր ՀՀ պաշտպանության նախարար Սեյրան Օհանյանը, բարձրաստիճաններ զինվորականներ Հայաստանից և Արցախից:

Կարեն Հովհաննիսյանի ծառայակից ընկեր Մելքոն Մելքոնյանը, որը դեպքի ժամանակ Կարենի հետ է եղել դիրքերում, NEWS.am-ի հետ զրույցում ասաց, որ Կարենը եղել է օրինակելի զինվոր և ընկեր:

«Նա մեր ավագ ընկերն էր, նրա բոլոր խորհուրդները միշտ ընդունում էինք: Կարենը միշտ դժվար ու վտանգավոր աշխատանքներն իր վրա էր վերցնում, ամեն ինչ անում էր, որպեսզի մեր մարտական դիրքը լավագույնը լինի»,- պատմեց Կարեն Հովհաննիսյանի ջոկի հրամանատար Մելքոն Մելքոնյանը:

Ծառայակիցը հիշեց Կարենի հետ վերջին խոսակցությունը. նա ընկերոջն իր ապագա պլանների մասին էր պատմել:

«Ասում էր, երբ վերադառնա, պետք է իր տունը վերանորոգի, սենյակն իրեն հարմարեցնի, ուզում է ամուսնանալ: Ուզում էր շարունակել ֆուտբոլով զբաղվել, բայց  չէր ուզում միայն ֆուտբոլիստ լինել, երազում էր լավ աշխատանք գտնել եւ իր ընտանիքին օգնել»,- հիշեց ծառայակից ընկերը:

Մելքոնյանի խոսքով` Կարենը շատ լուրջ էր մոտենում իր զինվորական պարտականություններին եւ կարծում էր, որ յուրաքանչյուր հայ տղա պետք է ծառայի բանակում. «Մեզ միշտ հորդորում էր, որ ամեն վայրկյան սթափ լինենք, որպեսզի ոչ մի վրիպում թույլ չտանք»:

Կարեն Հովհաննիսյանին կհուղարկավորեն վաղը` Շահումյանի երկրորդ գերեզմանատանը։

ԼՂՀ պետական սահմանը պաշտպանելիս ցուցաբերած արիության համար Կարեն Հովհաննիսյանը հետմահու պարգեւատրվել է «Մարտական ծառայություն» մեդալով:

Ավելի վաղ NEWS.am–ը հաղորդել էր, որ ՊԲ արեւելյան ուղղությամբ տեղակայված զորամասերից մեկի մարտական հենակետում oգոտոսի 12-ին հակառակորդի հրազենից սպանված 23-ամյա Կարեն Հովհաննիսյանը ժամկետային զինծառայող էր, պետք է զորացրվեր դեկտեմբերի 25-ին: