Թուրքիայում լույս է տեսել Սևան Նշանյանի՝ ժամանակակից թուրքերենի մինչ օրս եղած ամենաընդգրկուն ստուգաբանական բառարանը

Թուրքիայում լույս է տեսել պոլսահայ հայտնի գրող, լեզվաբան և գործարար Սևան Նշանյանի հեղինակած թուրքերենի բառարանի՝ վերանայված ու թարմացված նոր հրատարակությունը։

Ինչպես նշված է բառարանը լույս ընծայած Liber Plus հրատարակչատան պաշտոնական ֆեյսբուքյան էջում, «Նշանյանի բառարան» անվանումը կրող այս գիրքը համարվում է ժամանակակից թուրքերենի՝ մինչ օրս հրատարակված ամենաընդգրկուն ստուգաբանական բառարանը։

Գիրքն արդեն վաճառքի է հանվել առցանց հարթակներում ու Թուրքիայի տարբեր քաղաքների գրախանութներում։

Սևան Նշանյանը ծնվել է 1956թ.-ին Ստամբուլում: Ճարտարապետ Վաղարշ Նշանյանի որդին է։ Ավարտել է նախ Յեյլի, այնուհետ՝ Կոլումբիայի համալսարանը:

1985թ.-ին Նշանյանը վերադարձել է Թուրքիա՝ պարտադիր զինվորական ծառայություն անցնելու համար։ Հետագա երկու տասնամյակներում նա հանդես է եկել որպես գրող և ուղեցույցների խմբագիր։ Լրագրող Թոմաս Գոլցի հետ նա հրատարակել է մի շարք ուղեցույցներ Թուրքիայի շրջանների մասին։

2004թ. պարգևատրվել է Թուրքիայի մարդու իրավունքների ասսոցիացիայի մրցանակով։

Նշանյանը գրել է «Սխալ Հանրապետություն» գիրքը (թուրքերեն Yanlış Cumhuriyet), որը ներկայացնում է Թուրքիայի Հանրապետության հիմնադրման առասպելները։ Այն գրված է 1994թ., սակայն շրջանառվում էր լուսապատճենը, մինչև որ հնարավոր եղավ տպագրել 2008թ.:

2010թ.-ին Նշանյանը հրատարակել է Index Anatolicus-ը Թուրքիայի ավելի քան 16.000 տեղանուններով, որոնք փոխվել են թրքացման քաղաքականության պատճառով։ Ներառված համապարփակ փաստաթղթերը նախկինում չէին հրապարակվել և ներկայացնում են հազարավոր ավանդական անուններ, հիմնականում հունական, հայկական, քրդական, ասորական, արաբական ծագման, որոնք փոխարինվել են թուրքական անուններով 20-րդ դարում։

Index Anatolicus-ն առցանց է դարձել 2011թ.: Ներկայիս տվյալների բազան ներառում է ավելի քան 56.000 քարտեզագրված տեղանուն։