Մանչեսթեր Սիթիի ֆուտբոլիստը թվիթով է պատասխանել Գվարդիոլայի` սոց.ցանցերում ակտիվությունը նվազեցնելու կոչին

«Մանչեսթեր Սիթիի» պաշտպան Բենջամին Մենդին «Թվիթերի» իր էջում պատասխանել է թիմի գլխավոր մարզիչ Խոսեպ Գվարդիոլային, ով ֆուտբոլիստին կոչ է արել ավելի քիչ ժամանակ հատկացնել սոցիալական ցանցերին:

Մասնագետի մեջբերմանը արձագանքելով` Մենդին նախ գրել է «ուպս», իսկ ֆուտբոլին ավելի շատ ժամանակ հատկացնելու կոչին` րոպեներ անց արձագանքել է հետևյալ գրությամբ. «Կհատկացնեմ,ազնիվ խոսք»:

Հիշեցնենք` անգլիական Պրեմիեր-լիգայի առաջին տուրի խաղում, որում «Մանչեսթեր Սիթին» արտագնա խաղում 2:0 հաշվով հաղթել է «Արսենալին», Մենդին խաղադաշտում է անցկացրել ամբողջ 90 րոպե և դարձել է երկու գոլային փոխանցման հեղինակ:

Գվարդիոլան մասնավորապես ասել է.

«Երբեմն մենք ցանկանում ենք սպանել Մենդիին, երբեմն էլ ասում ենք ինչ հիանալի ֆուտբոլիստ ունենք: Նա մեզ էներգիա է տալիս: Մենդին բարելավելու շատ տեղ ունի և մենք հույս ունենք, որ կկարողանանք համոզել նրան մի փոքր մոռանալ սոցիալական ցանցերի մասին և որոշ բաներ բարելավել»:

Հիշեցնենք` Մենդին 2017 թվականի ամռանն է տեղափոխվել «Մանչեսթեր Սիթի» «Մոնակոյից», սակայն  2017/18 մրցաշրջանի մեծ մասը բաց է թողել վնասվածքի պատճառով: