ՀՀ-ում բոլոր ընտրակաշառք տվողները դատապարտվելու են, և հետո թող չասեն, թե քաղաքական հետապնդում է. Ն. Փաշինյանը՝ իջևանցիներին

Օգոստոսի 10-ին Տավուշի մարզ մեկնած վարչապետ Նիկոլ Փաշինյանի այցը շարունակվում է. բնակիչների հետ հանդիպումն այսօր Փաշինյանը սկսել է Իջևանից:

Իջևանի տարածաշրջանի համայնքների ղեկավարների հետ հանդիպումից հետո ՀՀ վարչապետը հանդիպեց իջևանցիների հետ:

Հարցնելով, թե ինչպես է իջևանցիների տրամադրությունը և ստանալով «լավ» պատասխանը՝ Նիկոլ Փաշինյանն ասաց, որ ինքը հույս ունի, որ տեղյակ են, որ սրանից հետո ՀՀ քաղաքացու տրամադրությունը պետք է միշտ լավ լինի, որովհետև ՀՀ քաղաքացին հաղթել է, և ՀՀ քաղաքացու հաղթանակն այլևս որևէ մեկը չի կարող կասկածի տակ դնել և ՀՀ քաղաքացու հաղթանակը որևէ մեկը չի կարող վերցնել:

«Այն, ինչ տեղի է ունեցել Հայաստանում, հետևյալ իմաստն ունի՝ ՀՀ ժողովրդի ձայնը լինելու է որոշիչ ՀՀ-ի տնտեսական, քաղաքական կյանքում, որ ՀՀ քաղաքացին այլևս չի համակերպվելու պարտությունների, անհավասարությունների, ապօրինությունների հետ, որ ՀՀ քաղաքացին այլևս լավատեսորեն է նայելու ապագային, որ ՀՀ քաղաքացին չի լինելու խնդրարկու, լինելու է պահանջատեր, չի լինելու աղքատ, լինելու է աշխատող, արարող ու բարիք ստեղծող:

Դուք գիտեք, որ մեր կառավարության կարևորագույն առաջնահերթություններ մեկը աղքատության հաղթահարումն է, որը մի պրոբլեմ է, որ մեր երկիրը ծվատում է արդեն երկար ժամանակ»,-ասաց Նիկոլ Փաշինյանը:

Նրա խոսքով՝ մտածելով, թե ինչ պետք է արվի, որ երկրում աղքատությունը հաղթահարվի, եկել է մի եզրակացության, որ կա մի երևույթ, որը երեկվանից հետո կոչել է «Այգեհովիտի սինդրոմ», որը պետք է հաղթահարվի:

«Մտածեցի, որ այդ երևույթը կարող ենք պայմանականորեն, որևէ բան նկատի չունենալով՝ անվանել «Այգեհովիտի սինդրոմ»: Ի՞նչ նկատի ունեմ դրանով. երեկ Այգեհովիտում կանգնեցինք և գյուղամիջում խոսակցության բռնվեցինք և ասացին՝ պարոն վարչապետ, աշխատատեղ չկա: Խոսակցության ընթացքում պարզվեց, որ հենց գյուղամիջում գտնվող փռի արտադրամասի սեփականատերը արդեն երկար ժամանակ Այգեհովիտ գյուղում փնտրում է երկու աշխատող՝ 100 հազ. դրամ աշխատավարձով, և չի կարողանում գտնել: Սա է մեր երկրի խորքային խնդիրներից մեկը»,-ասաց Փաշինյանը:

Նրա խոսքով՝ «Այգեհովիտի սինդրոմն» այն է, որ երկար տարիներ ՀՀ-ում վարած քաղաքականության հետևանքով է առաջացել, որ աղքատությունն ու աղքատության նպաստը որոշ դեպքերում դարձել է ավելի գերադասելի, քան աշխատելն ու աշխատելով վաստակելը. «Մի անգամ էլ գյուղատնտեսության նախարարից լսեցի, որ ասել են՝ բերքահավաքի ժամանակ 3-4 ամիս ինչո՞ւ աշխատեն, իսկ հետո զրկվեն աղքատության նպաստից: Իսկապես նման քաղաքականություն է վարվել, իսկ ՀՀ-ում նման քաղաքականություն վարվել է, որովհետև ՀՀ-ում հաստատված է եղել իշխանություն, որին ձեռնտու է եղել, որ մարդիկ լինեն աղքատ, որ ընտրությունների ժամանակ մարդկանց 5000 դրամը բաժանեն և այդ մարդկանց ստիպեն, որ իրենց օգտին քվեարկվեն, որ նրանց ասեն՝ տեսե՛ք, մեր օգտին չքվեարկեք աղքատության նպաստից կզրկվեք»:

ՀՀ վարչապետը նշեց, որ այսօրվա իշխանությունը ոչ թե մարդկանց օգնելու է, որ լինեն աղքատ, այլ չլինեն աղքատ, մարդկանց քաջալերելու են, որ նրանք աշխատեն, որովհետև ինքը համոզված է, որ հայ ժողովուրդը ձեռքը պարզող չէ, ձեռք մեկնող է, աշխատող է:

«Մեր իշխանությունը պետք է օգտագործենք ոչ թե մեր, այլ ձեր հարստացման համար, օգնեք մեզ դրանում»,-ասաց Փաշինյանը:

Փաշինյանն իր ելույթում նաև նշեց, որ ՀՀ-ում բոլոր ընտրակաշառք տվողները դատապարտվելու են, և հետո թող չասեն, թե դա քաղաքական հետապնդում է. «Բոլորը պետք է դատվեն, բայց խոսքը սրա մասին չէ, այլ նրա, որ քաղաքացին չպետք է թողնի, որ դրանք շենքից ներս մտնեն, փողով ընտրություն առնողները պետք է քաղաքականությունից դուրս մղվեն ընդհանրապես, որովհետև մի կիլո բրնձով ընտրություն կատարելով՝ դուք այդ մարդկանց լիազորում եք, որ ձեզ թալանեն: Մի՛ թույլ տվեք, որ ձեզ թալանեն, հետո այդ փողերը ծախսեն, որ «Ֆեյսբուքում» ֆեյքեր բացեն, որ իրենց պաշտպանեն, որ իրենց պաշտպանեն, որովհետև կենդանի մարդ չկա, որ իրենց պաշտպանի, մնացել է, որ իրենց պաշտպանեն ֆեյքերը, կամ նրանք, ում վրա իրենք կոմպրոմատ ունեն»,-հայտարարեց նա։

Փաշինյանը եզրափակեց իր խոսքը՝ նշելով, որ ավելի կարևոր բան ունի ասելու. «Բոլորիդ սիրում եմ, խոնարհվում եմ բոլորիդ առաջ, կեցցե Հայաստանի Հանրապետությունը, կեցցե այն, որ մեր երեխաները ապրելու են ազատ ու երջանիկ Հայաստանում»: