Իջևանի տարածաշրջանում առանց բնակիչների համաձայնության համայնքները չեն խոշորացվի. շարունակվում է Նիկոլ Փաշինյանի այցը Տավուշի մարզ

TERT.am11։17

ՀՀ վարչապետ Նիկոլ Փաշինյանի այցը Տավուշի մարզ շարունակվում է: Երեկ մարզ այցելած վարչապետն այսօր առաջին հանդիպումը սկսել է Իջևան քաղաքից: Վարչապետին ուղեկցում է   ՀՀ տարածքային կառավարման և զարգացման նախարար Սուրեն Պապիկյանը: 

Իջևան քաղաքում  մարզպետարանի աշխատակազմի հետ հանդիպման ժամանակ Նիկոլ Փաշինյանն ասաց, որ երեկվանից հանդիպումներ է ունեցել Բերդի և Նոյեմբերյանի տարածաշրջաններում, որտեղ համայնքների ղեկավարները որպես գոյություն ունեցող խնդիրների հիմնական պատճառ նշել են համայնքների խոշորացումը:

«Այստեղ գալու  ճանապարհին մտածում էի, որ Իջևանի տարածաշրջանի բոլոր համայնքների ղեկավարները պետք է լինեն գոհ ու երջանիկ և ոչ մի խնդիր չպետք է  ունենան: Համայնքապետներն ասում էին, որ  երբ խոշորացումը հետ պտտենք, ամեն ինչ կլինի լավ ու հոյակապ և մեծ թռիչքներով կզարգանա համայնքը: Եթե այս տրամաբանությունը ճիշտ է, ուրեմն Իջևանի տարածաշրջանի համայնքները ոչ մի պրոբլեմ չունեն, որովհետև այստեղ խոշորացում տեղի չի ունեցել: Նախատեսվում էր, որ համայնքների խոշորացումը նոյեմբերին պետք է տեղի ունենա, իսկ մենք հայտարարել ենք, որ նոյեմբերին առանց համայնքների համաձայնության այդ փոփոխությունը տեղի չի ունենալու»,-ասաց Փաշինյանը:

Վարչապետն ասաց, որ ակնկալում է, որ Իջևանի տարածաշրջանի համայնքների ղեկավարները այժմ կներկայացնեն, թե ինչպիսի մեծ հաջողությունների են հասել, քանի որ այդտեղ համայնքները չեն խոշորացվել։

Վարչապետն այսօր հանդիպումներ կունենա նաև այլ համայնքների ներկայացուցիչների հետ և կավարտի այցը Տավուշի մարզ։

Հիշեցնենք, որ երեկ Նիկոլ Փաշինյանը հանդիպել էր Բերդի բնակիչների հետ և իր ելույթում նշել, որ գտել են բոլոր հարցրերի լուծման բանալին։ Նա նաև հայտարարել էր, որ Մայիսից արտագաղթը Հայաստանում կանգնել է։

Անդրադառնալով համայնքների աշխատանքին՝ Փաշինյանն ասել էր, որ կառավարությունը պատրաստ է 10-15 միլիարդ դրամ տալ համայնքներին՝ սուբվենցիաների տեսքով, բայց համայնքները պատրաստ չեն դրան՝ չկան ծրագրեր: 

Ավելի ուշ՝ տեղական ինքնակառավարման մարմինների ներկայացուցիչների հետ հանդիպումից հետո, լրագրողների խնդրանքով Փաշինյանն անդրադարձել էր ՌԴ արտգործնախարար Սերգեյ Լավրովի հայտարարությանը, թե ՀՀ նոր իշխանությունները շեղվել են խոստումներից: ՀՀ վարչապետն ասել էր. «Բոլորս պետք է այս իրավիճակին ադապտացվենք, այդ թվում՝ մեր ռուս գործընկերները, այնպես որ ամեն ինչ նորմալ է»։ 

Այնուհետև Նիկոլ Փաշինյանը Տավուշի մարզում ծանոթացել էր թեթև արդյունաբերության և անասնապահության ոլորտներում նոր աշխատատեղերի ստեղծմանն ուղղված ծրագրերին։