Ըմբշամարտի ֆեդերացիայի գլխավոր քարտուղար. ԵԱ-ում բոլորը ցնցված էին, ասում էին՝ այս ինչ տղաներ ունեք

Հուլիսի 30-ից օգոստոսի 5-ը, Իտալիայի մայրաքաղաք Հռոմում կայացել է Եվրոպայի ըմբշամարտի երիտասարդական առաջնությունը, որում հայ ըմբիշներն աննախադեպ արդյունք են գրանցել. հունահռոմեական և ազատ ոճի ըմբիշները միասին նվաճել են 4 ոսկե և 6 բրոնզե մեդալ։

Այսօր լրագրողների հետ զրույցում Հայաստանի ըմբշամարտի ֆեդերացիայի գլխավոր քարտուղար Արայիկ Բաղդադյանն ամփոփել է մեր մարզիկների ելույթները, փոխանցում է «ArmSport.am-ի թղթակիցը.

«Ընդհանուր արդյունքներից շատ գոհ եմ։ Սա ոչ թե լավ, այլ գերազանց արդյունք է։ Տղաների մասնակցությունը քննարկել ենք ֆեդերացիայի նախագահ Ռոբերտ Խաչատրյանի հետ և գերազանց ենք գնահատել։

Երկու հավաքականներն էլ թիմային հաշվարկում զբաղեցրել են երրորդ հորիզոնականը, սակայն հիմնական հակառակորդ թիմերը մասնակցում էին 10 ըմբիշներով, իսկ մենք՝ 8»,- ասել է Արայիկ Բաղդադյանը։

Ֆեդերացիայի գլխավոր քարտուղարն ընդգծել է, որ երկարատև աշխատանքի շնորհիվ ազատոճային ըմբիշները սկսել են հունահռոմեականների նման լուրջ հաջողություններ գրանցել միջազգային հարթակներում․

«Սա երկարատև, թիմային աշխատանքի արդյունք է։ Այս երեխաներից դեռ 2-3 տարի առաջ էինք արդյունք սպասում։ Ֆեդերացիայի, Օլիմպիական կոմիտեի համատեղ աշխատանքի շնորհիվ հասանք արդյունքի»։

Արայիկ Բաղդադյանը նշել է, որ նախքան Տոկիոյի Օլիմպիական խաղերը տղաներից ոմանք կհամալրեն ազգային ընտրանիների կազմերը․

«Հույս ունենք, որ ամեն թիմից մեկ կամ երկու մարզիկ կհամալրեն ազգային հավաքականների կազմը՝ Տոկիոյի Օլիմպիական խաղերին մասնակցելու համար։ Պարզապես հնարավոր են քաշային կարգերի խնդիրներ։ Դեռ ժամանակ կա, ժամանակը ցույց կտա»։

Արայիկ Բաղդադյանի խոսքով, մեր մարզիկների համար նշանակություն չունի, թե իրենց մրցակիցներն ինչ ազգից են․

«Ադրբեջանցի մարզիկները շատ ծանր են տանում հայերից կրած պարտությունները։ Մեր տղաների համար նշանակություն չունի, թե ինչ ազգի ներկայացուցչի հետ են մրցում։ Ադրբեջանցիները ծանր են տանում, իսկ մենք նրանց դիտարկում ենք որպես գորգի վրա հակառակորդ»։

Ֆեդերացիայի գլխավոր քարտուղարը հավելել է, որ մյուս երկրների պատվիրակությունները զարմացած են եղել մեր ըմբիշների գրանցած արդյունքներից․

«Բոլորը ցնցված էին։ Ասում էին՝ էս ինչ տղաներ ունեք։ Նման արդյունքների շնորհիվ մյուս երկրներն արդեն ցանկանում են համագործակցել մեզ հետ։ Գերմանիայի հավաքականը կարող է գալ Ծաղկաձորում համատեղ հավաք անցկացնել, նույն էլ Լեհաստանի հավաքականը»,- եզրափակել է իր խոսքը Արայիկ Բաղդադյանը: