Գործող սահմանադրության և նոր սահմանադրության նախագծի համեմատությունը հետաքրքիր երևույթներ է ի հայտ բերում

Մովսես Դեմիրճյանը ֆեյսբուքյան իր էջում գրում է .

Գործող սահմանադրության և նոր սահմանադրության նախագծի համեմատությունը հետաքրքիր երևույթներ է ի հայտ բերում:

Գործող սահմանադրություն, հոդված 29. «Յուրաքանչյուր ոք ունի խաղաղ, առանց զենքի հավաքներ անցկացնելու իրավունք»։

Նոր սահմանադրության նախագիծ, հոդված 43. «Յուրաքանչյուր ոք խաղաղ հավաքների ազատորեն մասնակցելու և դրանք կազմակերպելու իրավունք ունի»:

Նոր սահմանադրության նախագծից դուրս է եղել «առանց զենքի» ձևակերպումը, մնացել է միայն «խաղաղ հավաքը»: Ստացվում է, որ նոր սահմանադրության հեղինակները նույնացրել են «առանց զենքի հավաքը» և «խաղաղ հավաքը»:

Մինչդեռ տրամաբանությունն ասում է, որ

1. եթե հավաքի մասնակիցներից մեկը զինված է, դա դեռ հիմք չի տալիս հավաքը ոչ խաղաղ անվանելու։
2. հավաքը կարող է ոչ խաղաղ լինել նաև առանց զենքի։
3. եթե «առանց զենքի հավաք» նշանակում է «խաղաղ հավաք», ապա «ոչ խաղաղ հավաք» նշանակում է «զենքով հավաք», մինչդեռ երկրորդ կետը հուշում է, որ հավաքը կարող է ոչ խաղաղ լինել նաև առանց զենքի՝ ծեծկռտուքով, բռնության կիրառմամբ և այլն:

Տրամաբանությունը հուշում է նաև, որ գործող սահմանադրության մեջ, փաստորեն, «խաղաղ հավաքը» հասկացվում է շատ նեղ իմաստով՝ որպես առանց զենքի անցնող հավաք, քանի որ հոդվածում ստորակետով գրված է «խաղաղ, առանց զենքի հավաքներ»: Նոր սահմանադրության նախագծում այդ սահմանափակումը վերացվել է, և այսուհետ հավաքը կարող է համարվել ոչ խաղաղ ոչ միայն այն դեպքում, եթե առկա է զենք, այլև եթե տեղի է ունենում ծեծկռտուք, բռնություն, պարտադրանք: