10 տարին էական չէ, Պերմյակովը կազատազրկվի ցմահ. փաստաբան

12 Օգոստոս, 2015 23:34

NEWS.am-ը գրում է.

Տասը տարվա ազատազրկումն էական չէ, Վալերի Պերմյակովին սպասվում է ցմահ ազատազրկում։ Այս մասին այսօր` օգոստոսի 12-ին, NEWS.am-ի հետ զրույցում ասաց Գյումրիում սպանված Ավետիսյանների ընտանիքի իրավահաջորդների փաստաբան Լուսինե Սահակյանը` մեկնաբանելով ՌԴ Հյուսիսկովկասյան օկրուգի զինվորական դատարանի 5–րդ կայազորային դատարանի վճիռը, որով Ավետիսյանների ընտանիքի սպանության մեջ մեղադրվող Վալերի Պերմյակովը դասալքության ու ապօրինի կերպով զենք կրելու համար դատապարտվեց 10 տարվա ազատազրկման։

«Մեզ համար էական չէ, թե քանի տարով կդատապարտվեր այս գործով: Եթե մյուս գործով դատարանը նրան մեղավոր ճանաչի, ապա նա միանաշանակ ցմահ ազատազրկման կդատպարտվի»,- Գյումրիի ռուսական ռազմաբազայի տարածքում կայացած դատավարությունից հետո ասաց փաստաբանը։

Այսօրվա դատավարությունը Լուսինե Սահակյանն անվանեց արտառոց, քանի որ, ըստ նրա, 72 հատորից բաղկացած քրեական գործը մեկ օրում քննել եւ որոշում կայացնելը «անիրականանալի է»:

Լուսինե Սահակյանին զարմանալի է թվացել նաեւ Վալերի Պերմյակովի պահվածքը դատարանում.«Այնպիսի տպավորություն էր, որ կարծես իր դատավարությունը չլիներ, իրեն չվերաբերվեր»:

Փաստաբանին զարմացրել էր նաեւ դատաբժշկական փորձաքննության եզրակացությունը, ըստ որի, Պերմյակովը ընդհանրապես ոչ հիվանդությամբ չի տառապում եւ ագրեսիվ չի:

Փաստաբանը Սահակյանը պատրաստվում է կրկնակի փորձաքննություն անցկացնելու վերաբերյալ միջնորդություն ներկայացնել:

Ինչպես ավելի վաղ հաղորդվել էր, Վալերի Պերմյակովին մեղադրանք է ներկայացվել Ռուսաստանի Քրեական օրենսգրքի 338-րդ հոդվածի երկրորդ մասով, 226-րդ հոդվածի երրորդ մասի «գ» կետով եւ 222-րդ հոդվածի առաջին մասով։ Զինվորական լինելով, նա այս տարվա հունվարի 12-ին ինքնակամ լքել է ծառայության վայրը զինվորական ծառայությունից խուսափելու նպատակով, զենքով եւ զինամթերքով զինված։

Հիշեցնենք, որ դատազորության եւ փոխադարձ իրավական օգնության վերաբերյալ ՌԴ եւ ՀՀ-ի միջեւ 1997 թվի օգոստոսի 29-ին կնքված Համաձայնագրի հիման վրա, որը վերաբերում է ՀՀ տարածքում տեղակայված ռազմական բազային, հուլիսի 13-ին քրեական գործի այն նյութերը, որոնք վերաբերում են Ավետիսյանների ընտանիքի անդամների սպանությանը, փոխանցվել են Հայաստանի իրավապահ մարմիններին։

Հիշեցնենք, որ Վալերի Պերմյակովը մեղադրվում է հունվարի 12-ին առանց թույլտվության ծառայությունը լքելու, զենքով քաղաք դուրս գալու եւ Գյումրիի տներից մեկում Ավետիսյանների ընտանիքի 6 անդամի գնդակահարելու, իսկ 6 ամսական փոքրիկին դանակահարելու համար։ Վերջինը նույնպես ավելի ուշ հիվանդանոցում մահացել էր: