Գրող Խորեն Արամունու 70-ամյակը նշանավորվեց նրա «Անմարդկային կատակերգություն» գրքի շնորհանդես
ՀասարակությունԱմերիկաբնակ գրող Խորեն Արամունու «Անմարդկային կատակերգություն» գիրքը բաժանված է երեք մասի՝ իրանական խճանկարներ, հայաստանյան խճանկարներ և ամերիկյան խճանկարներ: Հեղինակն անդրադարձել է Իրանում, Երևանում և ԱՄՆ-ում ապրած տարիներին իրեն հանդիպած անմարդկային երևույթներին: Գրքի շնորհանդեսն անցկացվեց հուլիսի 30-ին Հայաստանի գրողների միությունում:
«Իմ կյանքի փորձառություններն են նկարագրված. այն, ինչ տեսել եմ: Ի տարբերություն Վիլյամ Սարոյանի «Մարդկային կատակերգություն» գրքի՝ սա «Անմարդկային կատակերգություն» է: Ներկայացրել եմ իրական դեպքեր, որոնց գեղարվեստական շունչ եմ հաղորդել»,-«Արմենպրես»-ի թղթակցի հետ զրույցում նշեց Արամունին:
Անդրադառնալով իր՝ երեք տարբեր երկրներում երկար տարիներ ապրելուն՝ հեղինակն ասաց, որ չի պատկերացնում որևէ ստեղծագործողի, ով մեկուսացված է, չի տեղաշարժվում, բայց կարող է գրականությամբ զբաղվել: «Օտար երկրներում լինելը շատ մեծ դերակատարություն ունի գրողի կյանքում: Իրանում ապրած քսան տարվա, Խորհրդային Միությունում ապրած տասը տարվա և ԱՄՆ-ում ապրած 35 տարվա փորձառությունները այդ երկրների մեծ մշակույթի խառնուրդն են, համեմունքը, որոնք կարողանում եմ, աշխատում եմ ի մի բերել իմ գործերում: Դա նման է մի ճաշի, որում խառնում ես տարբեր ազգերի համեմունքներ, և շատ ախորժելի բան է ստացվում»,- խոստովանեց Արամունին:
Նա ասաց, որ շատ անելիքներ ունի: «Իմ մեջ դեռ ինչ-որ բան կա, որը թելադրում է ստեղծել: Ամբողջ կյանքում փնտրում եմ և դեռ իրական Արամունուն չեմ գտել»,- եզրափակեց գրողը:
Հայաստանի գրողների միության նախագահ Էդվարդ Միլիտոնյանն ասաց, որ Խորեն Արամունին իր կուրսընկերն է: Միլիտոնյանի խոսքով՝ շուրջ հինգ տարի միասին են սովորել, բայց Արամունին ոչ մի անգամ գրելու ցանկություն չի հայտնել: Տարիներ անց, երբ Արամունուն հանդիպել է ԱՄՆ-ում, շատ է ուրախացել՝ տեսնելով, որ նա ընթերցողների հարգանքն է վայելում: «ԱՄՆ-ում տարբեր հասարակություններում լինելով՝ նա իր բնավորությանը գումարել է հումորի և սարկազմի շերտեր, որոնք նա հմտորեն գործածել է իր ստեղծագործություններում, որոնք էլ դրանով ավելի ուղղամիտ, նպատակային դարձան»,-ընդգծեց Միլիտոնյանը՝ սրտանց շնորհավորելով Արամունուն:
Գիրքը տպագրվել է ԱՄՆ-ում և Հայաստանում: Դրա բազմաթիվ օրինակներ կհամալրեն ՀՀ մարզերի և Արցախի գրադարանները:
Խորեն Արամունին ծնվել է 1948 թվականին Իրանում: Միջնակարգ կրթություն ստացել է Թեհրանում: Սովորել է Սպահանի համալսարանի հայագիտական բաժնում։ 1969 թվականին հայրենադարձել է։ Հայրենիքում ավարտել է ԵՊՀ-ի բանասիրական ֆակուլտետը, հետագայում գաղթել է ԱՄՆ: 1991-2005 թվականներին Երևանում և Լոս Անջելեսում հրատարակվել են նրա պատմվածքների, վիպակների, թատերգությունների ժողովածուները, «Թատրոն» խորագրով վեպը և «Դպրոցի ճամփան» հուշապատումը։ Լոս Անջելեսում և Երևանում բեմադրվել են նրա հեղինակած մի շարք թատերգություններ։
Արամունու թարգմանությամբ 2012 թվականին հրատարակվել է Էսմաիլ Ռայինի «Հայերի զանգվածային կոտորածները» գիրքը։ Նրա թատերգություններից բեմադրվել են՝ «Հարութ պապը», «Պողոս քեռու այցը», «Երթ ու դարձի տոմս», «Անվերադարձ ապագա», «Ետցնցում», «Պատանդը» գործերը:
1
2
3
4
5
1
2
3
4
5
5
