Այս 12-ամյա աղջկա IQ-ն ավելի բարձր է, քան Էյնշտեյնինն ու Սթիվեն Հոքինգինը

Blognews.am-ը գրում է.

12-ամյա Նիկոլ Բարն ապրում է Մեծ Բրիտանիայի գնչուական համայնքներից մեկում։ Նրա IQ թեստի արդյունքը 162 միավոր է, ինչը նշանակում է, որ աղջիկը երկու միավորով ավելի բարձր IQ ունի, քան աշխարհահռչակ հանճարներ Ալբերտ Էնշտեյնն ու Սթիվեն Հոքինգը։

Բարը հանձնեց «Mensa»-ի IQ թեստն այն բանից հետո, երբ նրա հայրը սկսեց կասկածել, որ իր դստեր տպավորիչ հիշողությունը կարող է օգնել վերջինիս հռչակավոր այս կազմակերպության անդամ դառնալ, որն ընդունում է միայն ամենաբարձր IQ ունեցող մարդկանց, ովքեր ընդհանուր առմամբ 2 տոկոս են կազմում ամբողջ աշխարհում։ 
«Հանճարները» սովորաբար 140 միավորից բարձր են հավաքում, իսկ միջին միավորը 100 է։

Ինչևէ, հարկ է նշել, որ Բարի հավաքած բարձր միավորը դեռ չի նշանակում, որ նա նաև ավելի խելացի է, քան Էյնշտեյնը կամ Հոքինգը, կամ էլ որ մյուսները, ովքեր նրանից ավելի ցածր միավորներ են հավաքում, պակաս խելացի են։ Վերջին տասնամյակի ընթացքում նեյրոգիտնականները ցույց են տվել, որ IQ թեստերը մարդու ինտելեկտի ամբողջական պատկերը ցույց տալ չեն կարող։

Չնայած այս թեստը կարող է պատշաճ ձևով չափել հիշողությունը, մաթեմատիկական կարողությունը, բանավոր մտածողությունը և տրամաբանությունը, 2012թ․-ին արված գիտական հետազոտությունը ցույց է տվել, որ այն սկզբունքայնորեն թերի է, երբ խոսքը վերաբերում է ընդհանուր ինտելեկտը չափելուն, որը ներառում է ուղեղի մի քանի հատվածների միաժամանակյա աշխատանքը։

Ինչևէ, փաստն այն է, որ IQ թեստը դեռևս շարունակում է մնալ այն հիմնական գործիքը, որով հասարակությունը չափում է ինտելեկտուալ կարողությունը, այնպես որ պատմության երկու ամենահայտնի հանճարներին միավորներով գերազանցելը բավականին տպավորիչ է։

Դեռևս հայտնի չէ՝ արդյո՞ք Բարը կընդունվի «Mensa», որն ամբողջ աշխարհից 120,000 անդամ ունի, որոնց միայն 35 տոկոսն են կանայք, ու 8 տոկոսը՝ երեխաներ։ Սակայն եթե որոշիչը նրա հավաքած միավորներն են, ապա կարող ենք վստահ լինել դրանում, քանի որ իր արդյունքով նա աշխարհի բնակչության ընդամենը 1 տոկոսի մեջ է մտնում, ում IQ-ն այսքան բարձր է։