Հանկարծամահ է եղել Երեւանի կենդանաբանական այգու արու ամուրյան վագրը

Հանկարծամահ է եղել Երեւանի կկենդանաբանական այգու ամուրյան վագրերից արուն՝ Նոբելը: Այս մասին NEWS.am-ին հայտնել են Կենդանաբանական այգու մամուլի ծառայությունից:

«Ցավով տեղեկացնում ենք, որ Երեւանի կենդանաբանական այգու ամուրյան վագրերից արուն՝ Նոբելը, հանկարծամահ է եղել»,- նշվում է տարածված հաղորդագրության մեջ:

Ինչպես հայտնում են կենդանաբանական այգու մամուլի ծառայությունում, Նոբելը ծնվել էր Կալինինգրադի կենդանաբանական այգում 2001 թվականի օգոստոսի 25-ին: Մեկ ամսից պիտի լրանար զառամյալ արուի 18 տարին, եթե ծերությունը չսպառեր նրա կենսական ուժերը: Նոբելը պատկանում էր վագրերի ամուրյան տեսակին: Հայրը Վիլիսն էր, իսկ մայրը՝ Պուրդան: Նրա տոհմային համարն էր 4652-ը: Վայրի բնության մեջ վագրերն ապրում են միջինում 15 տարի, իսկ անազատության մեջ, բացառիկ դեպքերում, մինչեւ 25:

Հաղորդագրության մեջ նշվում է, որ Նոբելը Երեւանի կենդանաբանական այգի էր եկել 2005 թ.ի մայիսի 9-ին: Ընկերուհու՝ Գերտայի հետ նրանք, Նոբելի մեղքով, այդպես էլ սերունդ չտվեցին: Կենդանու անկումը գրանցվել է այսօր՝ հուլիսի 20-ին, կեսօրին մոտ: Նրան խնամողը նկատել էր ազատավանդակի տարածքում՝ անշարժ պառկած:

Դին տեղափոխվել է Կենդանաբանական այգու կլինիկա, դիահերձաման արդյունքում արվել է նմուշառում օրգաններից (լյարդ, փայծախ, երիկամ եւ թոք), որոնք ըստ սահմանված կարգի ուղարկվել են Հանրապետական անասնաբուժասանիտարական եւ բուսասանիտարական լաբորատոր ծառայությունների կենտրոն՝ փորձաքննության: Անկման նախնական պատճառը, ըստ ԵԿԱ կենդանաբուժի, ծերությունն է: