Ոչ ռուսականի «հալն է հալ», ոչ՝ ռուսականով թոշակ ստացողների

Գայանե Հովսեփյանը ֆեյսբուքյան իր էջում գրում է.

ՀՀ շարքային քաղաքացիների մի զգալի մասի / որոնց թիվն օրեցօր ավելանում է/ երազանքը՝օրախնդիր հարցերի շարքում, ռուսականով թոշակի անցնելն է: Դրա մի կարեւոր պատճառն այն է, որ Հայաստանում թոշակի տարիքի շեմն սկսվում է 63-ից՝ կանանց համար, 65-ից՝ տղամարդկանց:

Ու սա որոշվեց 1996թվին՝ նախորդ իշխանությունների օրոք. միգուցե՝ այն նկատառումներով, որ մարդկանց 55 տարին լրանալուն պես  իրավունք չունենան նրանց թոշակի ուղարկել հիմնարկ-ձեռնարկություններում, բայց, քանի որ 1998 թվից հետո գործարանների թիվը վերջնականապես ու անհուսալիորեն կրճատվեց, ուստի դրանից հետո, ինչպես ասում են՝ «վարունգն սկսեց թարս բուսնել». մանավանդ, որ քիչ չէ՝ 55-ից բարձր տարիքի մարդիկ արդեն աշխատաշուկայում մրցունակ չեն , դեռ մի բան էլ ՝թոշակ ստանալուց էլ զրկվեցին՝ մինչեւ 63 տարեկանը. ու առաջացավ մի խավ, որ ոչ աշխատող էր, որ աշխատավարձ ստանար, ոչ թոշակառու էր, որ թոշակ ստանար:

Իսկ Ռուսաստանում ավելի մարդասեր էին ու պահպանել էին խորհրդային ավանդույթները. մարդկանց թոշակի էին ուղարկում 55-60 տարեկանից: Ու դրա համար՝ հայաստանյան քաղաքացիներն աշխատում են Ռուսաստանում գրանցվել ՝բարեկամ-հարազատների մոտ, ու այնտեղ թոշակի անցնել, հետո էլ՝ հարկ եղած դեպքում ռուսաստանյան բարձր թոշակով Հայաստանում ապրել:Բայց՝ «հայի բախտ է». նախ՝ հիմա էլ Ռուսաստանում են ուզում վատն ընդօրինակել ու թոշակի շեմը բարձրացնել. երկրորդ՝ ռուսական ռուբլու կուրսն օրեցօր անկում է ապրում Հայաստանում՝ օրական 100դրամով իջնելով՝ 1000ռուբլու մեջ ու հասել է 7300 դրամի. ընդամենը մեկ ամսում՝ 1000դրամով իջնելով. իսկ մեկ-երկու տարի առաջ ռուսականի կուրսը հասնում էր անգամ 12-13հազար դրամի:

Ընդ որում՝ ռուսականի կուրսը Ռուսաստանում էլ է անկում ապրում՝ Արեւմուտքի տնտեսական սանկցիաների շնորհիվ. թեպետ ՌԴ պետական այրերը հավաստիացնում են, որ մինչեւ տարեվերջ ռուսական ռուբլու կուրսը կամրապնդվի:

Իսկ մինչ այդ՝ ռուսականով թոշակ ստացող հայաստանցիները չգիտեն՝ բախտավոր ե՞ն, որ ռուսականով են թոշակ ստանում, թե՞՝ դժբախտ: