Գյումրիում այսօր մեկնարկել է Վալերի Պերմյակովի գործով դատավարությունը

Գյումրիում այսօր՝ օգոստոսի 12-ին, մեկնարկել է ռուսական ռազմաբազայի զինծառայող Վալերի Պերմյակովի գործով դատավարությունը: Հիշեցնենք, որ խոսքը դասալքության մասին է: Ավետիսյանների ընտանիքի սպանության գործը գտնվում է Հայաստանի Քննչական կոմիտեի վարույթում :

Դատը վարում է 5-րդ կայազորային ռազմական դատարանի նախագահի ժ.պ Ալեքսանդր Շելդյաեւը: Մեղադրական կողմը ներկայացնում է Հարավային ռազմական օկրուգի ռազմական դատախազության ռազմական դատախազի տեղակալ արդարադատության գնդապետ Վլադիմիր Անդրուսենկոն: Պաշտպանությունն իրականացնում է փաստաբան Արթուր Դանիելյանը:

Պերմյակովին մեղադրանք է ներկայացվել ՌԴ ՔՕ 338-րդ հոդվածի 2-րդ մասի, 226-րդ հոդվածի 3-րդ մասի 3-րդ կետի եւ 222-րդ հոդվածի 1-ին մասի հատկանիշներով: Զինվորական ծառայություն իրականացնելիս նա զենքով եւ զինամթերքով լքել է ծառայության վայրը զինծառայությունից խուսափելու նպատակով:

Չնայած հայտարարված էր, որ դատավարությունը բաց է լինելու, դատարանի դահլիճ մտնելն այդքան էլ հեշտ չէր: Խստացված է հսկողությունը բազայի եւ անմիջականորեն դատարանի դահլիճի մուտքի մոտ: Դատարանի որոշմամբ՝ նկարահանումները թույլատրվել են միայն առաջին քառորդ ժամվա ընթացքում: Որպես տուժած կողմի ներկայացուցիչ՝ գործով անցնում է ռազմաբազայի պետ գեներալ-մայոր Վլադիմիր Ուստինովը: Դատարանը գործընթացի մասնակիցներին բացատրեց նրանց իրավունքներն ու պարտականությունները: Ամբաստանյալը դատարանին իր մասին տեղեկություններ հայտնեց: Նրա խոսքով՝ նախկինում ինքը ոստիկանություն բերման չի ենթարկվել եւ դատվածություն չի ունեցել:

Հիշեցնենք, որ ՀՀ-ի եւ ՌԴ-ի միջեւ ՀՀ-ում ռուսական ռազմաբազայի տեղակայման հետ կապված հարցերով իրավասաությունների եւ փոխադարձ օգնության մասին  1997թ. օգոստոսի 29-ին կնքված համաձայնության հիման վրա հուլիսի 13-ին Ավետիսյանների սպանության քրեական գործի նյութերը փոխանցվել են հայկական իրավապահ մարմիններին: