Երբ անհատն անվճար երթևեկություն է ապահովում, հարց է առաջանում՝ եթե նա որոշի այլ կերպ ծախսել գումարները, քաղաքը մնալո՞ւ է առանց տրանսպորտի. ՀՀ վարչապետ
ՀասարակությունԵրևանի նոր քաղաքապետի ուշադրության կենտրոնում պետք է լինեն հասարակական տրանսպորտի խնդիրները: Ինչպես հաղորդում է «Արմենպրես»-ը, այս մասին ֆեյսբուքի իր էջում ուղիղ հեռարձակման ժամանակ, պատասխանելով տրվող հարցերին, ասաց ՀՀ վարչապետ Նիկոլ Փաշինյանը:
«Ծանր զգացողություններ եմ ունենում, երբ տեսնում եմ Երևանում կռացած երթևեկող մեր հայրենակիցներին: Այդ «հուսահատության գազելները» Երևանում, ցավոք, շարունակում են գործել: Այդ խնդիրը պետք է Երևանի նոր քաղաքապետի ուշադրության կենտրոնում լինի: Իհարկե, նաև մարզային տրանսպորտային ցանցը նորացնելու ծրագրեր ենք մշակում կառավարությունում: Տրանսպորտի, կապի և տեղեկատվական տեխնոլոգիաների նախարարությունում ընթացքի մեջ են միասնական երթուղային ցանցի ներդրման աշխատանքները»,- ասաց վարչապետը:
Նա նկատեց, որ լրջագույն խնդիրներ են առաջանում այն դեպքերում, երբ տվյալ երթուղին սպասարկում է անհատը: «Երբ որևէ անհատ անվճար երթևեկություն է ապահովում, հարց է առաջանում՝ եթե նա մի օր սննկանա, կամ որոշի այլ կերպ ծախսել գումարները, այսինքն դա նշանակո՞ւմ է, որ քաղաքը մնալու է առանց տրանսպորտի: Հարցը պետք է որոշակի տնտեսական ռելսերի վրա դրվի», - նշեց վարչապետը:
Փաշինյանը նկատեց, որ անձնական նախաձեռնություների հիման վրա տրանսպորտ ապահովելը լուրջ խնդիր է ոչ միայն Երևանում, այլև ողջ Հայաստանի տարածքում:
«Այս հարցերը պետք է լինեն կառավարության ուշադրության կենտրոնում: Այս բոլոր խնդիրները կապված են մի խնդրի՝ պետական եկամուտների ավելացման հետ: Իսկ պետբյուջեի մեծացման երկու ուղի կա՝ կոռուպցիայի դեմ պայքարը, ստվերի կրճատումն ու տնտեսության զարգացումն ու այն օտարերկրյա ներդրողների համար ավելի գրավիչ դարձնելը: Մենք շարժվում ենք այս ճանապարհով»,- ասաց Փաշինյանը՝ ընդգծելով, որ խնդիրը մեկ օրում չի լուծվի, դրա համար ժամանակ է հարկավոր:
1
2
3
4
5
1
2
3
4
5
5
